جموں و کشمیر میں بے گھر افراد کو ملے گا پانچ مرلے کا پلاٹ اور گھر
بے زمینوں کو زمین اور بے گھر افراد کو گھر فراہم کرنا ایک انقلابی قدم ہے: منوج سنہا
لازوال ڈیسک
جموں و کشمیر کے لیفٹیننٹ گورنر نے یہاں ایک بیان میں کہا ہے کہ سری نگر میں جی – 20 ٹورازم ور کنگ گروپ میٹنگ کے بعد جموں و کشمیر میں غیر ملکی سیاحوں کی آمد میں نمایاں اضافہ ہوا ہے اور آنے والے دنوں میں یہ تعداد مزید بڑھنے کا امکان ہے۔ انہوں نے جموں و کشمیر کے بے گھر خاندانوں کے لیے پانچ مرلہ اراضی کا بھی اعلان کیا اور کہا کہ وزیر اعظم آواس یوجنا ( یوجنا ) کے تحت جموں و کشمیر میں تقریباً دولاکھ بے گھر خاندانوں کو گھر فراہم کیے جارہے ہیں۔ ایل جی نے راج بھون میں ایک پریس کانفرنس سے تبادلہ خیال کرتے ہوئے کہا کہ اس سال 22 مئی سے 25 مئی تک سری نگر میں منعقدہ کامیاب جی – 20 اجلاس سیاحت کے لیے گیم چینجر ثابت ہو رہا ہے۔
انہوں نے کہا کہ جی – 20 میٹنگ کے بعد، ہم نے جموں و کشمیر میں غیر ملکی سیاحوں کی آمد میں نمایاں اضافہ دیکھا ہے اور آنے والے مہینوں میں یہ تعداد مزید بڑھنے والی ہے”۔ ایل جی نے مزید کہا کہ سری نگر تیزی سے بین الا قوامی سر گرمیوں کے مرکز کے طور پر ابھر رہا ہے۔انہوں نے کہا کہ وزیر اعظم نریندر مودی نے پی ایم آواس یوجنا کا اعلان کیا تھا اور جموں و کشمیر بھی اس میں پیچھے نہیں رہ سکتا۔ ”انتظامی کو نسل میں اور محکمہ ریونیو اور دیہی ترقی کے ساتھ اس مسئلے پر بات چیت کے بعد، یہ فیصلہ کیا گیا کہ جموں و کشمیر کے بے زمین خاندانوں کو 5 مرلہ اراضی دی جائے گی۔ اب تک 2711 بے زمین خاندانوں کو اراضی دی گئی ہے اور جلد ہی مزید کا احاطہ کیا جائے گا۔ اسی طرح جہاں تک بے گھر خاندانوں کا تعلق ہے، مجموعی طور پر 1,99,550 خاندانوں کی نشاندہی کی گئی ہے اور 21 جون تک 1,44000 خاندانوں کو منظوری دی گئی ہے جبکہ باقی کو بھی کو ر کیاجائے گا۔ ایل جی نے کہا کہ اس سکیم میں کسی ذات اور مذہب کی پیروی نہیں کی جارہی ہے ؟ ایک مناسب اہلیت کے معیار پر عمل کیا جارہا ہے۔ جو بھی اہل ہے اس کا احاطہ کیا جارہا ہے”۔ انہوں نے کہا کہ بے زمینوں کو زمین اور بے گھر افراد کو گھر فراہم کرنا ایک انقلابی قدم ہے۔ انہوں نے کہا کہ ایک بار جب کسی غریب کا گھر بن جاتا ہے، تو وہ روزی کمانے اور اپنے بچوں کو سکول بھیجنے کے بارے میں سوچے گا۔ ایل جی نے کہا کہ زمین اور گھر صرف ان کی متعلقہ پنچایتوں میں اہل لوگوں کو دیئے جارہے ہیں۔ ایسا نہیں ہے کہ جو اننت ناگ ضلع میں اہل ہوا سے سانبہ میں گھر دیا جائے گا”۔وہیں امر ناتھ یاترا کے بارے میں انہوں نے کہا کہ یا تر ا مناسب حفاظتی انتظامات کے درمیان آسانی سے چل رہی ہے۔ انہوں نے مزید کہا کہ تشویش کا ایک شعبہ سیاحوں اور مقامی شہریوں کا ٹریفک مینجمنٹ ہے جسے اگلے دو دنوں میں ہموار کیا جارہا ہے۔ ایل جی نے کہا، ” اس بات کو یقینی بنایا جارہا ہے کہ مقامی لوگوں کو کم سے کم تکلیف کا سامنا کرنا پڑے”۔ یہ پوچھے جانے پر کہ وی آئی پی موومنٹ کے دوران لوگوں کو تکلیف کا سامنا کرنا پڑتا ہے، ایل جی نے کہا کہ لوگ معمول کے مطابق محسوس کر رہے ہیں اور آنے والے مہینوں میں مزید لوگ اسے محسوس کریں گے۔ جیسا کہ میں نے کہا، اگلے دودنوں میں ٹریفک کے انتظام کو ہموار کر دیا جائے گا اور اس لیے ٹریفک ریگولیشن پلان پر کام کیا جارہا ہے جسے اگلے دودنوں میں نافذ کر دیا جائے گا۔
