عدالتی اَفسران اور بارممبران کے ساتھ اِستفساری گفتگو کی
لازوال ڈیسک
جموں؍؍چیف جسٹس ( قائم مقام ) جموں و کشمیر اور لداخ ہائی کورٹ جسٹس تاشی ربستن نے ضلع کشتواڑ کی مختلف عدالتوں کاتفصیلی معائینہ کیا۔جسٹس تاشی ربستن کے ہمراہ پرنسپل سیکرٹری ایم کے شرما، ممبر سیکرٹری جے اینڈ کے لیگل سروسز اَتھارٹی امت کمار گپتا تھے۔ اُن کا والہانہ اِستقبال پی ڈی جے (چیئرمین ڈی ایل ایس اے) کشتواڑ منجیت سنگھ منہاس،سیکرٹری ڈی ایل ایس اے کشتواڑ رومیش لال،ڈِسٹرکٹ موبائل مجسٹریٹ اروند منہاس، منصف کشتواڑ کرتار سنگھ نے کیا۔ اِس موقعہ پر ایس ایس پی کشتواڑ عبدالقیوم، ایڈیشنل ڈِسٹرکٹ ڈیولپمنٹ کمشنر غلام رسول، ڈی وائی ایس پی ہیڈکوارٹرز ڈاکٹر ایشان گپتا ، ڈی وائی ایس پی ڈی اے آر سجاد خان، سول اور پولیس اِنتظامیہ کے افسران اور بار ایسوسی ایشن کشتواڑ کے ممبران بھی موجود تھے۔
چیف جسٹس کو گارڈ آف آنر بھی دیا گیا۔جسٹس تاشی ربستن نے اَپنے دورے کے دوران مختلف عدالتوں کے کام کاج کا باریک بینی سے جائزہ لیا، سہولیات کی جانچ پڑتال کی اور اس بات کو یقینی بنایا کہ وہ مؤثر طریقے سے انصاف کی فراہمی کے لئے مطلوبہ معیارات پر پورا اُتریں۔ اُنہوں نے سول اور پولیس اِنتظامیہ کے اَفسران، جوڈیشل افسران اور بار ایسوسی ایشن کے ممبران سے الگ الگ ملاقاتیں کیں۔اُنہوں نے جوڈیشل افسران سے بات چیت کرتے ہوئے جسٹس تاشی عدالتی طرز عمل اور دیانتداری کے اعلیٰ ترین معیارات کو برقرار رکھیں اور شہریوں پر مرکوز نقطہ نظر کو برقرار رکھنے کی اہمیت پر زور دیا تاکہ اس بات کو یقینی بنایا جاسکے کہ انصاف کی فراہمی کا طریقہ کار سب کے لئے بالخصوص معاشرے پسماندہ اور کمزور طبقوں کے لئے قابل رسائی اور سستا رہے۔
اُنہوں نے پرانے مقدمات بالخصوص بزرگ شہریوں، خواتین اور بچوں سے متعلق مقدمات کو تیزی سے نمٹانے کو یقینی بنانے کی اہمیت پر بھی زور دیا۔جسٹس تاشی نے صدر بار ایسوسی ایشن کشتواڑ کی طرف سے اُٹھائے گئے مسائل اور مطالبات کو بغور سُنا جس میں خالی عدالتوں کو بھرنے اور عدالتی بنیادی ڈھانچے کو وسعت دینے کے لئے زمین کی نشاندہی کی اشد ضرورت شامل تھی۔ چیف جسٹس نے بار کو یقین دلایا کہ خالی عدالتوں کو جلد پُرکیا جائے گا۔ مزید برآں، اُنہوں نے سول اِنتظامیہ کو خصوصی ہدایات جاری کرتے ہوئے ایڈیشنل ڈسٹرکٹ ڈیولپمنٹ کمشنر کو ہدایت دی کہ جدید سہولیات سے اَپ گریڈ شدہ کورٹ انفراسٹرکچر کی تعمیر کے لئے مناسب اراضی کی نشاندہی میں تیزی لائی جائے۔
کشتواڑ کے راستے میں جسٹس تاشی نے بار ایسوسی ایشن ٹھٹھری کے ممبران سے بھی ملاقات کی اور ان سے اِستفساری گفتگو کی۔ صدر بار ایسوسی ایشن ٹھٹھری نے چیف جسٹس کو مطالبات کی یادداشت پیش کی جس میں ان کے حقیقی مطالبات کے جلد حل کی یقین دہانی کی گئی۔چیف جسٹس (قائم مقام) کا یہ دورہ ایک ذمہ دار اور جوابدہ عدلیہ کو فروغ دینے کے لئے ان کے عزم کی عکاسی کرتا ہے۔ باقاعدگی سے معائینے کرنے اور اہم شراکت داروں کے ساتھ مشغول ہونے میں ان کا فعال نقطہ نظر ایک ایسے عدالتی نظام کے بارے میں ان کے ویژن کی عکاسی کرتا ہے جو نہ صرف مؤثر ہو بلکہ ہمدردانہ اور عوام کی ضروریات کے مطابق بھی ہو۔
