حیدرآباد//تلنگانہ انتخابات میں سیاسی جماعتوں کی جانب سے رائے دہندوں کوراغب کرنے کیلئے پُرکشش وعدے کئے جارہے ہیں۔ریاست کی اصل اپوزیشن جماعت کانگریس نے جہاں اس تلگو ریاست میں برسراقتدارآنے پر500روپئے میں گیس سلنڈردینے کا وعدہ کیاہے تاہم اس کے جواب میں ریاست کی برسراقتدار بی آرایس نے 400روپئے میں گیس سلنڈر کا وعدہ کردیاہے۔اس دوڑ میں ایک امیدوار نے آگے بڑھتے ہوئے رائے دہندوں کیلئے صرف ایک روپیہ میں گیس سلنڈرفراہم کرنے کا انوکھاوعدہ کیا ہے۔یہ وعدہ سوشیل میڈیا پر بحث کا موضوع بناہوا ہے۔تفصیلات کے مطابق حلقہ اسمبلی صنعت نگر سے آل انڈیافارورڈ بلاک کے امیدوار وی وینکٹیش یادونے یہ اعلان کرتے ہوئے کہاکہ نہ صرف وہ ایک روپیہ میں گیس سلنڈر فراہم کریں گے بلکہ مفت علاج کی سہولت بھی فراہم کریں گے۔
