نروال بالا پنچائت کوجے ایم سی حدود میں شامل کرنے کے اقدام کی مذمت کی
لازوال ڈیسک
جموں؍؍اپنی پارٹی کے صوبائی صدر، جموں کے ایس ٹی ونگ، شبیر کوہلی نے آج نروال بالا پنچایت کو جموں میونسپل کارپوریشن کی میونسپل حدود میں شامل کرنے کی تجویز کی سخت مذمت کی۔اپنے ایک بیان میںکوہلی نے کہا کہ پنچایت نروال بالا کو ایک سیاسی جماعت کی سازش کا سامنا ہے جو جموں کو ترقی کی امید دلاتی ہے، لیکن وہ تقسیم کے ایجنڈے کی وجہ سے اپنے وعدوں میں ناکام رہی ہے۔انہوں نے نروال بالا کے کریانی تالاب میں بلائی گئی ایک میٹنگ میں کہا، ’’ہم کسی بھی ایسے اقدام کی اجازت نہیں دیں گے جس سے اختلافات پیدا ہوں، اور ترقی کے نام پر نروال بالا کے لوگوں پر ٹیکسوں کا بوجھ ڈالا جائے جو کہ پنچایت پر نہیں ڈالا جا سکتا۔اس موقع پر سرکردہ لوگوں کی جانب سے پنچایت میں ابھرتے ہوئے مسئلے پر بات چیت کی گئی۔
انہوں نے کہا کہ عوام نے اس اقدام کے خلاف گھنٹی بجا دی ہے، اور وہ یہ ماننے کو تیار نہیں کہ نروال بالا کو میونسپل حدود میں شامل کیا جائے۔انہوں نے بنیادی سہولیات میں بہتری کا مطالبہ کرتے ہوئے کہاکہ نروال بالا میں لوگوں کی اکثریت غریب معاشی پس منظر سے تعلق رکھتی ہے اور اس لیے وہ حکومت کی توجہ کے مستحق ہیں، نہ کہ حکام کے ٹیکسوں کے۔انہوں نے حکام کو خبردار کیا کہ وہ اسٹیک ہولڈرز سے مشاورت کے بغیر نروال بالا کے حوالے سے کوئی بھی فیصلہ نہ کریں۔
