بی جی ایس بی یو کیمپس مختلف اسکولوں کے طلباء سے بھرا ہوا ہے

مستقبل میں بھی یونیورسٹی طلباء کے فائدے کے لیے ایسے دوروں کی سہولت فراہم کرے گی:پروفیسر اکبر مسعود
لازوال ڈیسک
راجوری؍؍بابا غلام شاہ بادشاہ یونیورسٹی کیمپس پچھلے ڈھائی مہینوں سے راجوری اور پونچھ کے جڑواں اضلاع کے مختلف اسکولوں کے 2100 سے زائد طلباء سے کھچا کھچ بھرا ہوا ہے۔ واضح رہے یہ دورے مختلف اسکولوں کے زیر اہتمام تعلیمی دوروں کا حصہ ہیں۔تاہم یونیورسٹی کیمپس کے سرسبز و شاداب لان کا دورہ کرنے کے علاوہ، آنے والے طلباء نے فیکلٹی ممبران کے ساتھ بات چیت کے ذریعے یونیورسٹی کی تعلیمی زندگی کا تجربہ کیا۔ خاص طور پر طلباء نے یونیورسٹی کے مختلف شعبہ جات کی جدید ترین لیبارٹریز کا دورہ کیا۔وہیں بات چیت کے دوران طلباء کو یونیورسٹی کے مختلف تدریسی پروگراموں، تحقیقی اقدامات اور آؤٹ ریچ سرگرمیوں سے آگاہ کیا گیا۔
اس سلسلے میںیونیورسٹی کے وائس چانسلر پروفیسر اکبر مسعود نے اسے سکولوں کے طلباء کو یونیورسٹی کی تعلیمی اور تحقیقی سہولیات سے آشنا کرنے کی طرف ایک صحت مند رجحان قرار دیا۔ پروفیسر اکبر نے کہا کہ اس طرح کے دورے طلباء کے افق کو وسیع کریں گے اور انہیں اعلیٰ تعلیم حاصل کرنے کی ترغیب دیں گے۔ پروفیسر اکبر نے کہا کہ اس طرح کی بات چیت سے اسکول جانے والے نوجوان بچوں کو سیکھنے کے اعلیٰ مقام پر ہونے والی سرگرمیوں کا پہلے ہاتھ کا تجربہ حاصل کرنے میں مدد ملے گی۔ پروفیسر اکبر نے وکست بھارت کے قومی مقصد کی تکمیل کے لیے اس طرح کی بات چیت اور تعاون کی ضرورت پر زور دیا۔ پروفیسر اکبر نے کہا کہ مستقبل میں بھی یونیورسٹی طلباء کے فائدے کے لیے ایسے دوروں کی سہولت فراہم کرے گی۔