بالانگیر، // وزیر اعظم نریندر مودی نے ہفتہ کو کہا کہ اوڈیشہ میں بیجو جنتا دل (بی جے ڈی) کی حکومت کی رخصتی کی الٹی گنتی شروع ہوگئی ہے اور 4 جون کو مکمل ہوجائے گی۔
آج یہاں لوک سبھا اور اسمبلی انتخابات کے لیے بھارتیہ جنتا پارٹی (بی جے پی) کے امیدواروں کی حمایت میں ایک انتخابی ریلی سے خطاب کرتے ہوئے مسٹر مودی نے کہا کہ بی جے پی کے اوڈیشہ میں پیدا ہونے والے وزیر اعلیٰ اس بار حلف لیں گے اور یہ ‘مودی کی گارنٹی’ ہے۔ انہوں نے کہا کہ اوڈیشہ کا فخر اور ثقافت خطرے میں ہے اور بی جے پی ریاست کو گروی رکھنے کی اجازت نہیں دے گی۔ انہوں نے لوگوں سے اپیل کی کہ وہ پٹاخے پھوڑ کر اور ڈھول بجا کر چیف منسٹر نوین پٹنائک کو شاندار وداعی دیں۔
انہوں نے الزام لگایا کہ مسٹر پٹنائک زمینی حقیقت سے کٹے ہوئے ہیں اور لوگوں سے جڑے نہیں ہیں۔ وہ عوام کے مسائل کو نہیں سمجھ سکے اور ریاست کے لوگوں کے ہنر اور صلاحیتوں کو سمجھنے میں بھی ناکام رہے۔ وزیر اعلیٰ پر طنز کرتے ہوئے انہوں نے لوگوں سے کہا کہ وہ ان سے (وزیر اعلیٰ) ایک سوال پوچھیں کہ اگر اتفاق سے وہ کانٹا بانجی اسمبلی حلقہ میں انتخابی مہم چلاتے ہیں تو اپنی روایتی ہنجیلی اسمبلی سیٹ کے علاوہ انہیں 10 گاؤں کے نام بتائیں۔ وہ حلقہ جہاں سے وہ الیکشن لڑ رہے ہیں۔ انہوں نے کہا، ’’مجھے یقین ہے کہ وزیر اعلیٰ کانٹا بانجی اسمبلی حلقہ کے دس گاؤں کا نام نہیں بتا سکیں گے۔‘‘
وزیر اعظم نے کہا کہ اوڈیشہ قدرتی وسائل سے مالا مال ہے لیکن اس کے لوگ غربت سے نبرد آزما ہیں اور آج بھی یہ ملک کی غریب ترین ریاستوں میں سے ایک ہے۔ اس افسوسناک صورتحال کے لیے بی جے ڈی حکومت کو ذمہ دار ٹھہراتے ہوئے انہوں نے لوگوں سے پٹنائک حکومت کو الوداع کرنے اور لوک سبھا اور اسمبلی انتخابات میں بی جے پی امیدواروں کے حق میں اپنا حق رائے دہی استعمال کرنے کی اپیل کی، تاکہ ریاست میں ڈبل انجن والی حکومت قائم ہو۔
مسٹر مودی نے کہا کہ بی جے ڈی حکومت کے 25 سالہ دور میں اس کے لیڈر بڑے بڑے بنگلے اور کاروں سے امیر ہوگئے لیکن عوام غریب ہی رہے۔ لوگوں کی نقل مکانی جاری ہے۔ انہوں نے بی جے ڈی حکومت پر سخت نکتہ چینی کی کہ وہ ریاست کے کسانوں کو کو ایم ایس پی اور ان کی زمینوں کو آبپاشی کی سہولیات فراہم نہ کرکے دھوکہ دے رہی ہے۔
