نئی دہلی، //یونین پبلک سروس کمیشن نے بدھ کو نیشنل ڈیفنس اکیڈمی (این ڈی اے) اور نیول اکیڈمی امتحان (II) کے حتمی نتائج کا اعلان کیا گیا جس میں کل 699 امیدواروں کو میرٹ لسٹ میں شامل کیا گیا ہے۔
کمیشن نے اس کے لیے 3 ستمبر 2023 کو تحریری امتحان لیا تھا۔ تحریری امتحان میں کامیاب ہونے والے امیدواروں کے انٹرویوز لیے گئے۔
یونین پبلک سروس کمیشن کے جاری کردہ اعلامیہ کے مطابق تحریری امتحان اور انٹرویو کے نتائج کی بنیاد پر این ڈی اے کے 152ویں کورس اور انڈین نیول اکیڈمی کے 114ویں کورس کے لیے کوالیفائی کرنے والے 699 امیدواروں کی فہرست میرٹ کے مطابق جاری کی گئی ہے۔
یہ فہرست وزارت دفاع کی ویب سائٹ joinindianarmy.nic.in، joinindiannavy.gov.in اور careerinindianairforce.cdac.in پر دیکھی جا سکتی ہے۔
بیان میں کہا گیا ہے کہ امیدواروں کے نمبر حتمی نتائج کے اعلان کی تاریخ سے 15 دن بعد ویب سائٹ پر دستیاب ہوں گے۔ ان امتحانات کے ذریعے آرمی، نیوی اور ایئر فورس میں پرائمری لیول کے کمیشنڈ افسران کی تقرری کی جاتی ہے۔
