ڈرل کے دوران سیلاب کے پانی سے بچاؤ کی مختلف تکنیکوں اور مہارتوں کا مظاہرہ کیاگیا
لازوال ڈیسک
جموں// نیشنل ڈیزاسٹر ریسپانس فورس نے ریاستی ڈیزاسٹر رسپانس فورس، سول ڈیفنس، فائر سرویس ڈیپارٹمنٹ اور جموں و کشمیر پولیس سمیت دیگر اسٹیک ہولڈرز کے ساتھ مل کرآج یہاں ضلع جموں کے تحت سیلاب کے پانی سے بچاؤ کے لیے ایک فرضی مشق کا انعقاد کیا۔وہیں اس موقع پر اسسٹنٹ کمشنر (جنرل) منیشا، اسسٹنٹ کمشنر ڈیولپمنٹ پریتی شرما، سب ڈویژنل مجسٹریٹس اور دیگر افسران کی موجودگی میں کوٹ بھلوال کے ایک تالاب پر عملی فرضی مشق کا مظاہرہ کیا گیا۔ڈیزاسٹر مینجمنٹ میں شامل اسٹیک ہولڈر ایجنسیوں کی تیاری اور ہم آہنگی کو جانچنے کے لیے دو دن تک فرضی مشق کا انعقاد کیا گیا۔ گزشتہ روز ڈپٹی کمشنر آفس میں سیلابی پانی سے بچاؤ پر ایک ٹیبل ٹاپ مشق کا انعقاد کیا گیا جس کی صدارت ایڈیشنل ڈپٹی کمشنر سندیپ سیونترا نے کی۔گورنمنٹ ہائر سیکنڈری سکول کوٹ بھلوال کے طلباء سمیت 500 کے قریب افراد نے فرضی مشق کا مشاہدہ کیا۔ وہیںاین ڈی آر ایف کی ٹیم نے سیلاب کے پانی سے بچاؤ کی مختلف تکنیکوں اور مہارتوں کا مظاہرہ کیا، جیسے کشتی آپریشن، لائف جیکٹ کا استعمال، رسی بچاؤ، زخمیوں کو نکالنا، ابتدائی طبی امداد وغیرہ۔فرضی مشق کا مقصد کسی بھی سیلابی صورتحال کی صورت میں ضلعی انتظامیہ اور دیگر اداروں کی استعداد کار اور ردعمل کو بڑھانا تھا۔ اس نے سیلاب کے دوران کیا کرنے اور نہ کرنے کے بارے میں عوام میں بیداری پیدا کی۔این ڈی آر ایف کی ٹیم نے طلباء اور عوام سے بھی بات چیت کی اور ڈیزاسٹر مینجمنٹ سے متعلق ان کے سوالات کا جواب دیا۔ انہوں نے سیلاب سے بچاؤ کی تجاویز پر پمفلٹ اور اسٹیکرز بھی تقسیم کئے۔فرضی مشق کو ضلعی انتظامیہ اور عوام نے اس کی پیشہ ورانہ مہارت اور تاثیر کو سراہا۔ این ڈی آر ایف ٹیم کا بھی قوم کے لیے اس کی گراں قدر خدمات کے لیے شکریہ ادا کیا گیا۔
