یواین آئی
رانچی؍؍ ہندوستانی بلے باز روہت شرما نے جنوبی افریقہ کے خلاف ٹیسٹ سیریز میں مین آف دی میچ اور مین آف دی سریز منتخب ہونے کے بعد ٹیم مینجمنٹ کا انہیں ٹیسٹ میں اوپننگ کا موقع دیئے جانے پر اظہار تشکر کیا ہے ۔روہت نے منگل کو مکمل ہوئے تیسرے ٹیسٹ میں ہندستان کے لیے اننگز اور 202 رنز کی فتح میں اہم کردار ادا کیا اور اپنی 212 رنز کی اننگز کے لیے انہیں مین آف دی میچ منتخب کیا گیا جبکہ سیریز میں تین سنچری اننگز کے لئے مین آف دی میچ بنے ۔ انہوں نے پہلے ٹیسٹ میں 176 اور 127 رنز کی اننگز کھیلی تھیں۔ ہندستانی بلے باز نے میچ کے بعد کہاکہ میں ٹیم مینجمنٹ کا اوپننگ آرڈر میں کھیلنے کا موقع دیئے جانے پر شکریہ ادا کرنا چاہتا ہوں۔ نئی گیند سے کھیلنے پر مجھے کافی اعتماد ملا۔ نئی گیند سے کھیلنا ہمیشہ مشکل ہوتا ہے اور اس کا اتنے اچھے طریقے سے سامنا کرنا میرے لئے کافی مثبت ہے ۔ میں یہاں سے اسی کارکردگی کو آگے لے جانا چاہتا ہوں۔انہوں نے کہاکہ میں نے 2013 سے وائٹ بال کرکٹ میں اوپننگ کرنا شروع کیا تھا۔ اس وقت سے مجھے اس بات کا احساس ہوا تھا کہ مجھے اس فارمیٹ میں زیادہ نظم و ضبط کے ساتھ کھیلنے کی ضرورت ہے ۔ اسی سے مجھے بلے بازی میں کامیابی ملی ہے ۔ جب اپنی ٹیم کے لئے اوپننگ کرتے ہیں تو اسی مضبوط ذہنیت کی ضرورت ہوتی ہے ۔روہت نے اپنی کارکردگی پر کہاکہ مجھے کپتان اور کوچ کی حمایت ملی ہے ۔ ٹیسٹ کرکٹ بالکل مختلف ہے اور اس میں ڈبل سنچری آپ کا حوصلہ بڑھاتی ہے ۔ میں ہمیشہ مانتا ہوں کہ غلطیاں ہی آپ کو آؤٹ کراتی ہیں۔ میں ڈبل سنچری بنانے کیلئے خود کو مسلسل حوصلہ افزا کرتا رہا تھا۔ میں بڑا اسکور بنا کر ٹیم کو اچھی پوزیشن میں لانا چاہتا تھا۔
