افسران کو عوامی مسائل کے بروقت ازالہ کیلئے موقع پر ہی ہدایات بھی دیں
شاہ ہلال
اننت ناگ؍؍عوامی مسائل اور شکایات کو موثر طریقے سے حل کرنے کی کوشش میں ڈیزاسٹر منیجمنٹ ، ریلیف ، بحالی اور تعمیر نو کے سیکرٹری انیل کول نے ٹاؤن ہال قاضی گنڈ میں ایک بڑے عوامی دربار کی صدارت کی۔ عوامی دربار کے دوران سیکرٹری نے انتظامیہ اور شہریوں کے درمیان خلیج کو ختم کرنے میں اس طرح کے آؤٹ ریچ پروگراموں کے اہم کردار پر زور دیا ۔ انہوں نے اعلیٰ سطحی حکومتی عہدیداروں کی اہمیت کو اجاگر کیا کہ وہ عوام کے ساتھ براہ راست رابطہ کر کے مسائل حل کرتے ہیں ۔
مختلف سرکاری محکموں کے سربراہان ، بشمول ریونیو ، پولیس ، پاور ، صحت ، تعلیم ، تعمیرات عامہ ، زراعت اور متعلقہ محکموں سے متعلق خدشات کو دور کرنے کیلئے موجود تھے ۔ سیکرٹری نے عوام کی شکایات اور مطالبات کو سُننے کے بعد شکایات کے ازالہ کیمپ میں موجود متعلقہ ضلعی افسران سے موقع پر ہی جواب طلب کیا۔ انہوں نے انہیں یقین دلایا کہ ان کے پیش کردہ تمام حقیقی مطالبات اور مسائل کو ترجیحی بنیادوں پر دیکھا جائے گا ۔ مسٹر انیل کول نے لائن ڈیپارٹمنٹس کے افسران کو عوامی مسائل کے بروقت ازالہ کیلئے موقع پر ہی ہدایات بھی دیں ۔ انہوں نے مرکزی اسپانسرڈ اسکیموں کو زمینی سطح پر لاگو کرنے پر زور دیا ۔ سیکرٹری موصوف نے اننت ناگ ضلع کے نوجوانوں کو تیزی سے کاروبار کی طرف راغب کرنے کی ستائش کی ۔
انہوں نے نوٹ کیا کہ انٹر پرنیور شپ میں اقتصادی ترقی کے ایک غیر استعمال شدہ ذریعہ کے طور پر کام کرنے کی صلاحیت ہے جس میں کاروباری افراد ملازمت کے متلاشیوں کے بجائے ملازمت کرنے والے بنتے ہیں ۔ انہوں نے بے روز گار نوجوانوں پر زور دیا کہ وہ مختلف سرکاری اسکیموں سے فائدہ اٹھائیں اور ان شعبوں میں مواقع تلاش کریں ۔ سیکرٹری موصوف نے قاضی گنڈ کے مکینوں کا ان کی فعال شرکت کیلئے شکریہ ادا کیا اور مستقبل میں مسلسل مصروفیات کی حوصلہ افزائی کی ۔
