یواین آئی
نئی دہلی؍لیجنڈ کرکٹر اور بھارت رتن ایوارڈ یافتہ سچن رمیش تنڈولکر ووٹروں کو بیدار کرنے کے لیے الیکشن کمیشن کی مہم میں ‘نیشنل آئیکون’ کے طور پر بدھ سے ایک نئی اننگز کا آغاز کریں گے۔الیکشن کمیشن اس مہم میں تعاون کے لیے کل یہاں ماسٹر بلاسٹر تنڈولکر کے ساتھ تین سالہ ایم او یو پر دستخط کرے گا۔ اس موقع پر چیف الیکشن کمشنر راجیو کمار اور الیکشن کمشنر انوپ چندر پانڈے اور ارون گوئل موجود رہیں گے۔الیکشن کمیشن نے منگل کو ایک بیان میں کہاکہ "یہ تعاون ملک کی نوجوان آبادی میں تنڈولکر کے منفرد اثر و رسوخ سے فائدہ اٹھانے کی طرف ایک اہم قدم ہوگا، تاکہ ووٹرز کی شراکت میں اضافہ ہو، خاص طور پر 2024 میں ہونے والے آئندہ عام انتخابات میں۔” اس شراکت داری کے ذریعے الیکشن کمیشن کا مقصد شہریوں، خاص طور پر نوجوانوں اور شہری آبادی کے ووٹنگ کے تناسب میں کمی کو دور کرنا ہے۔ اس طرح کی کوششوں کے ساتھ الیکشن کمیشن شہر کے لوگوں اور نوجوانوں میں انتخابی عمل کے تئیں بے حسی کے چیلنجوں سے نمٹنے کی کوشش کر رہا ہے۔واضح رہے کہ الیکشن کمیشن عوام کو انتخابی عمل میں حصہ لینے کے اپنے فرض سے آگاہ کرنے کے لیے مختلف شعبوں سے تعلق رکھنے والے نامور افراد کو ‘قوم کی شناخت’ کے طور پر پیش کرکے اپنی مہم میں شامل کرتا ہے۔ پچھلے سال کمیشن نے اداکار پنکج ترپاٹھی کو اس مہم سے ملک کی شناخت کے طور پر جوڑا تھا۔ اس سے قبل مہندر سنگھ دھونی، عامر خان اور میری کوم جیسے لیجنڈز 2019 کے لوک سبھا انتخابات کے دوران قومی شناخت بنے تھے۔
