ہوشیار پور،//پنجاب کے وزیر اعلی بھگونت مان نے ہفتہ کو کہا کہ عام آدمی پارٹی (اے اے پی) آنے والے لوک سبھا انتخابات میں ریاست کی تمام 13 سیٹوں اور چندی گڑھ کی ایک سیٹ جیت لے گی۔
وزیر اعلیٰ آج ہوشیار پور میں 867 کروڑ روپے کے ترقیاتی منصوبوں کا افتتاح کرنے کے بعد اجتماع سے خطاب کر رہے تھے۔ انہوں نے کہا کہ آنے والے لوک سبھا انتخابات میں 13-0 کا ہندسہ آپ کے حق میں ہوگا اور دوسری پارٹیوں کے کھاتے بھی نہیں کھلیں گے۔ مسٹر مان نے کہا کہ اکالی دل کے سربراہ ان کے خلاف ہتک عزت کا کوئی بھی مقدمہ دائر کرنے کے لیے تیار ہیں اور وہ اس مقدمے کا خیر مقدم کریں گے تاکہ لوگوں کے سامنے بادل خاندان کی کارروائیوں کو بے نقاب کیا جا سکے۔
مسٹر مان نے کہا کہ روایتی جماعتیں ان سے حسد کرتی ہیں کیونکہ وہ ایک عام خاندان سے ہیں اور لوگوں کی فلاح و بہبود کو یقینی بنانے کے لیے انتھک محنت کر رہے ہیں۔ وزیر اعلیٰ مان نے کہا کہ ان لیڈروں کا ہمیشہ سے یہ ماننا رہا ہے کہ ریاست پر حکمرانی کا انہیں خدائی حق حاصل ہے جس کی وجہ سے وہ یہ بات ہضم نہیں کر پا رہے ہیں کہ ایک عام آدمی ریاست کو احسن طریقے سے چلا رہا ہے۔ انہوں نے کہا کہ ان لیڈروں نے عرصہ دراز تک عوام کو بے وقوف بنایا لیکن اب لوگ ان کے گمراہ کن پروپیگنڈے سے متاثر نہیں ہورہے ہیں۔
وزیراعلیٰ نے کہا کہ یہ ایک تاریخی موقع ہے جب پورے کنڈی خطے کی قسمت بدل رہی ہے۔ انہوں نے کہا کہ ان منصوبوں سے علاقے کی ترقی میں تیزی آئے گی اور لوگوں کی زندگیوں میں خوشحالی آئے گی۔ مان نے کہا کہ سابقہ حکومتوں نے اس علاقے کو مکمل طور پر نظر انداز کیا تھا لیکن ان کی حکومت اس کی ہمہ گیر ترقی کے لیے پرعزم ہے۔
وزیر اعلیٰ نے آپ کے کنوینر اور دہلی کے وزیر اعلی اروند کیجریوال کو ایک عظیم اور انقلابی رہنما قرار دیا جنہوں نے عام آدمی کو ہندوستانی سیاست کے مرکز میں لایا ہے۔ انہوں نے کہا کہ یہ نہ تو کوئی سیاسی ریلی ہے اور نہ ہی طاقت کا مظاہرہ بلکہ یہ تقریب مکمل طور پر ہوشیار پور کی ترقی کے لیے وقف ہے۔ انہوں نے کہا کہ اب ہسپتالوں اور اسکولوں میں انقلابی تبدیلیاں دیکھنے کو مل رہی ہیں اور عام آدمی کی فلاح و بہبود کے لیے نئے میڈیکل کالج کھولے جا رہے ہیں۔ انہوں نے کہا کہ یہ فیصلے وہی لوگ کر رہے ہیں جو زمینی سطح پر عوام کے مسائل سے آگاہ ہوں۔ مسٹر مان نے کہا کہ روایتی سیاسی پارٹیوں نے ریاست کو برباد کر دیا ہے اور اب بڑی بے شرمی سے اخلاقیات کی بڑی باتیں کر رہے ہیں۔
