پاکستان نے امریکہ کے ساتھ دو طرفہ دورہ اور مذاکرات ملتوی کئے
وزیر خارجہ امریکہ جانے کے بجائے چین، روس اور دیگر ممالک کا دورہ کریں
یواین آئی

اسلام آباد؍؍پاکستانی حکومت نے امریکی صدر ڈونالڈ ٹرمپ کے پاکستان مخالف بیان کے خلاف امریکہ کے ساتھ ہونے والے تمام مذاکرات اور دو طرفہ دوروں کو ملتوی کردیا ہے ۔پاکستانی اخبار ڈان نے پاکستان کے وزیر خارجہ خواجہ محمد آصف کے حوالے سے بتایا کہ مسٹر ٹرمپ کے افغانستان پالیسی کے اعلان کرنے کے دوران پاکستان کی تنقید کے خلاف امریکہ کے ساتھ بات چیت اور دو طرفہ دورے کو ملتوی کردیا گیا ہے ۔مسٹر آصف نے سینیٹ کمیٹی کو بتایا کہ مسٹر ٹرمپ کے بیان کو سنجیدگی سے لیتے ہوئے پاکستان نے یہ قدام اٹھایا ہے ۔خیال رہے کہ امریکی صدر ڈونلڈ ٹرمپ نے 21 اگست کو افغانستان، پاکستان اور جنوبی ایشیاء کے حوالے سے نئی امریکی پالیسی کا اعلان کرتے ہوئے کہا تھا کہ ‘ہم پاکستان کو اربوں ڈالر ادا کرتے ہیں مگر پھر بھی پاکستان نے اُن ہی دہشت گردوں کو پناہ دے رکھی ہے جن کے خلاف ہماری جنگ جاری ہے ‘۔نئی امریکی پالیسی میں افغانستان میں ہندوستان کو اہم کردار دینے کا اشارہ بھی کیا گیا تھا جو پاکستان کے ان خدشات میں اضافے کا سبب بنا تھا کہ ہندوستان اس موقع کو استعمال کرکے پاکستان کے سرحدی علاقوں میں مسائل پیدا کرے گا۔اس حکمت عملی میں یہ بھی کہا گیا تھا کہ اگر پاکستان دہشت گردوں کی جانب سے امریکی اور افغان فورسز پر ہونے والے مبینہ سرحد پار حملوں کو نہیں روکتا تو تادیبی کارروائی کی جائے گی۔قابل ذکر ہے کہ مسٹر ٹرمپ نے ہفتے کے روز اپنے ٹیلی ویژن خطاب میں پاکستان کو خبردار کیا تھا کہ اگر وہ اپنی حکومت کو دہشت گردی کو محفوظ پناہ گاہ ہونے کی اجازت نہ دے تو اسے سیکورٹی امداد میں کمی کی جاسکتی ہے ۔ڈان کے مطابق امریکی صدر کے حالیہ بیان کے بعد بنائی گئی خصوصی کمیٹی کی سفارشات پر غور کیا گیا، اس موقع پر مشاہد حسین سید نے بتایا ہے کہ کمیٹی نے تجویز پیش کی ہے کہ وزیر خارجہ امریکہ جانے کے بجائے چین، روس اور دیگر ممالک کا دورہ کریں۔ذرائع کے مطابق خواجہ آصف نے امریکا کے حوالے سے ہر اقدام پر پارلیمنٹ کو اعتماد میں لینے کی یقین دہانی کروائی، ان کا کہنا تھا کہ مستقبل کی پالیسی کے بارے میں پارلیمنٹ کو اعتماد میں لیا جائے گا۔ذرائع نے بتایا کہ اپوزیشن ارکان نے امریکہ سے متعلق خارجہ پالیسی کا از سر نو جائزہ لینے کا مطالبہ کیا، بعض ارکان کی طرف سے قرار داد پاس کرانے کے لیے پارلیمنٹ کا مشترکہ اجلاس بلانے کی تجویز دی گئی۔خیال رہے کہ امریکی سفارت خانے کے ترجمان نے صحافیوں کو آگاہ کیا کہ ‘حکومت پاکستان کی درخواست پر ایلس ویلز کا دورہ پاکستان ملتوی کردیا گیا ہے تاہم دونوں حکومتیں باہمی مشاورت سے دورے کی نئی تاریخ کا اعلان کریں گی’۔واضح رہے کہ ایلس ویلز کے دورے کے شیڈول میں کی جانے والی یہ تبدیلی گذشتہ ہفتے کے دوران پاکستان کی جانب سے کیا جانے والا اس نوعیت کا دوسرا مطالبہ ہے ۔ جنوبی اور وسطی ایشیا کے امور کے امریکی سکریٹری خارجہ ایلیس ویلز کو طے پروگرام کے مطابق آج پاکستان آنا تھا جبکہ وزیر خارجہ خواجہ محمد آصف کے گذشتہ ہفتے ہونے والے امریکی دورے کو بھی ملتوی کر دیا گیا تھا۔ پاکستان کی خارجہ سکریٹری تھمینہ جنجوعہ نے بتایا کہ پانچ ستمبر سے شروع ہونے والی تمام سفیروں کے تین روزہ اجلاس اپنے طے وقت پر ہی ہوں گے ۔ سفیروں سے گفتگو کرکے حکمت عملی تیار کی جائے گی۔ امریکی صدر ڈونالڈ ٹرمپ نے گزشتہ ہفتے واشنگٹن کے قریب ایک فوجی ٹھکانے سے اپنے ایک ٹیلی ویژن خطاب میں افغانستان اور جنوبی ایشیا کے بارے میں امریکی حکمت عملی کا اعلان کیا تھا۔ اس حکمت عملی میں مسٹر ٹرمپ نے افغانستان میں چار ہزار اضافی فوجی بھیجنے کا بھی اعلان کیا ہے ۔

یواین آئی

• [dropcap]نئی دہلی؍؍؍جموں وکشمیر پردیش کانگریس کمیٹی (جے کے پی سی سی) کے اکتوبر میں منعقد ہونے والے پارٹی انتخابات میں غلام احمد میر کو دوبارہ صدر منتخب کئے جانے کا امکان ہے۔ پارٹی ذرائع نے یو این آئی کو بتایا ’مسٹر جی اے میر گذشتہ قریب اڑھائی برس سے کانگریس کی ریاستی اکائی کے صدر ہیں اور پارٹی کے قواعد وضوابط کے مطابق انتخاب امسال ستمبر یا اکتوبر میں عمل میں لائے جانے ہیں‘۔ انہوں نے بتایا ’عام طور پر پارٹی کا سربراہ پانچ سال کی مدت تک اپنا عہدہ برقرار رکھ سکتا ہے، لیکن موجودہ صدر کو برقرار رکھنے یا کسی دوسرے کا انتخاب عمل میں لانے کا اختیار پارٹی ہائی کمان کو حاصل ہے‘۔ ذرائع نے بتایا کہ مسٹر جی اے میر کو دوبارہ جے کے پی سی سی کا صدر منتخب کئے جانے کا قوی امکان ہے کیونکہ اُن کی بحیثیت ریاستی کانگریس چیف مدت غیرمتنازعہ رہی ہے۔ انہوں نے بتایا ’مسٹر میر نے بحیثیت ریاستی کانگریس چیف پارٹی کی مضبوطی اور بہتری کے لئے غیرمعمولی کام کیا ہے‘۔ پارٹی ذرائع نے بتایا کہ آل انڈیا کانگریس کمیٹی (اے آئی سی سی) ملک بھر میں ریاستی سطحوں پر پارٹی کو دوبارہ منظم کرے گی۔ انہوں نے بتایا کہ رواں برس 31 دسمبر سے پہلے نئے قومی صدر کا بھی انتخاب عمل میں لایا جائے گا۔ انہوں نے بتایا ’اسی عرصے کے دوران ملک بھر میں پارٹی کیڈر میں نئی روح پھونکنے کے اقدامات بھی اٹھائے جائیں گے‘۔ جموں وکشمیر کانگریس کے ایک سینئر لیڈر نے کہا ’ریاست میں پارٹی کیڈر کو بوتھ اور بلاک سطحوں پر مضبوط بنانے کا عمل جاری ہے اور امید کی جارہی ہے کہ ممبران متفقہ طور پر مسٹر میر کو دوسری ٹرم کے لئے پارٹی کا صدر منتخب کریں گے‘۔ مسٹر میر کو مارچ 2015 میں جے کے پی سی سی چیف منتخب کیا گیا تھا۔[/dropcap]

• لازوال ڈیسک
  جموں؍؍نائب وزیرا علیٰ ڈاکٹر نرمل سنگھ نے ترقیاتی کاموں کی رفتار میں بہتری لانے اور اُن کی عمل آوری پر کڑی نگرانی رکھنے کی ضرورت پر زور دیا ہے۔نائب وزیراعلیٰ ایک اعلیٰ سطحی میٹنگ سے خطاب کررہے تھے جس کا اہتمام امرت کے تحت جموں شہر میں جاری پروجیکٹوں کا جائزہ لینا تھا۔اس موقعہ پر

  

  ڈی سی جموں راجیو رنجن ، ایڈیشنل ڈی ڈی سی انورادھا گپتا ، ایڈیشنل ڈی سی ڈاکٹر ارون کمار منہاس ، سپرانٹنڈنگ انجینئر پی ڈی ڈی اور مختلف محکموں کے انجینئر اں موجود تھے۔ڈاکٹر سنگھ نے توپ شیر خانیہ ، بھارت نگر ، سندر نگر ، شار کاوہار ، لڑی کوٹانگر وغیرہ علاقوں میں گہری ڈرینوں پر جاری کام کی تفصیلات حاصل کیں۔ڈاکٹر سنگھ نے کہا کہ امرت کے تحت جموں شہر کو 206.15 کروڑ روپے واگذار کئے گئے ہیں جن کی بدولت شہری ٹرانسپورٹ ، گرین سپیسس ، ڈرنیج اور سوریج جیسے سیکٹروں پر کام شروع کیا گیا ہے ۔ نائب وزیرا علیٰ نے متعلقہ ایجنسیوں کو ہدایت دی کہ وہ ان پروجیکٹوں کو مقررہ وقت پر مکمل کریں اور معیاری کام کو یقینی بنائیں۔

یواین آئی

نئی دہلی؍؍آج سپریم کورٹ نے گجرات حکومت بڑی راحت دیتے ہوئے 2002 کے فسادات کے دوران تباہ ہونے مذہبی مقامات خاص طور پر مساجدوں کی از سرنوتعمیرکے گجرات ہائی کورٹ کے فیصلے کوآج مسترد کردیا اوراس معاملے میں ریاستی حکومت کی معاوضہ تجویز کو منظوری دے دی۔گجرات ہائی کورٹ نے گودھرا معاملے کے بعد ریاست میں ہونے والے فسادات کے دوران تباہ کئے گئے 500مذہبی مقامات (مسجدوں اور مقبروں) کو دوبارہ تعمیر کرنے کا حکم دیا تھا۔ 2012 میں آنے والے اس فیصلے کو اعلی عدالت میں چیلنج کیا گیا تھا۔چیف جسٹس دیپک مشرااور جسٹس پرفل چند پنت کی بینچ نے گجرات ہائی کورٹ کے حکم کے خلاف ریاستی حکومت کی اپیل کو قبول کرلیا۔تاہم،سپریم کورٹ میں سماعت کے دوران، گجرات حکومت نے کہا ہے کہ یہ تباہ شدہ مذہبی ڈھانچے کو عمارت مان کر معاوضہ دے گی۔گجرات کی حکومت نے منصوبہ بنایا تھا کہ تباہ شدہ عمارتوں کو زیادہ سے زیادہ 50 ہزار روپے کا معاوضہ دیا جائے گا۔ حکومت کے مطابق، مذہبی مقام یا مسجد کو مذہب کے نام پر نہیں بلکہ عمارت کے طور پر معاوضہ دیا جائے گا۔ریاستی حکومت کے اس معاوضہ منصوبے کو سپریم کورٹ نے آج منظوری دیتے ہوئے کہا کہ حکومت کسی بھی مذہبی مقامات کی تعمیر یا مرمت کرنے کے لئے ٹیکس دہندہ کے پیسے خرچ نہیں کر سکتی۔ اگر حکومت معاوضہ دینا چاہتی ہے تو اسے مندر، مسجد، گرووروا، چرچ وغیرہ کو اسے عمارت مان کر نقصان کی تلافی کرسکتی ہے ۔ریاستی حکومت کی اپیل کی سماعت کے دوران، سپریم کورٹ نے ریاستی حکومت کو ایسے ڈھانچے کے بارے میں تفصیلات مہیا کرنے اور ان کی تعمیر نو میں آنے والی لاگت کے بارے میں تفصیلی معلومات فراہم کرنے کی ہدایت دی ۔

لاہور/ پاکستان کرکٹ ٹیم کے دورہ نیوزی لینڈ کا شیڈول جاری کر دیا گیا جس میں 5 ون ڈے اور 3 ٹی ٹوئنٹی میچز شامل ہیں۔پاکستان کرکٹ ٹیم کے دورہ نیوزی لینڈ کا شیڈول جاری کر دیا گیا، گرین شرٹس میزبان ٹیم کے خلاف 5 ون ڈے اور 3 ٹی ٹوئنٹی میچز کھیلنے کیلیے جنوری میں کیویز کے دیس جائے گی۔ نیوزی لینڈ کرکٹ بورڈ نے ٹیم کے ہوم سیزن 2017-18 کا شیڈول کے مطابق پاکستان اور نیوزی لینڈ کے درمیان ون ڈے اور ٹی ٹوئنٹی سیریز 6 جنوری سے 28 جنوری تک کھیلی جائیں گی۔پہلا ون ڈے 6 جنوری کو ویلنگٹن، دوسرا 9 جنوری کو نیلسن، تیسرا 13 جنوری کو ڈونیڈن، چوتھا 16 جنوری کو ہیملٹن جبکہ پانچواں ون ڈے میچ ویلنگٹن میں 19 جنوری کو کھیلا جائے گا۔ 3 ٹی ٹوئنٹی پر مشتمل سیریز کا آغاز 22 جنوری سے ویلنگٹن میں ہو گا، 25 جنوری کو آکلینڈ اور 28 جنوری کو تورنگا میں کھیلے جائیں گے۔ نیوزی لینڈ کرکٹ بورڈ نے دسمبر میں دورہ کرنیوالی ویسٹ انڈیز ٹیم کے ساتھ ٹیسٹ میچز کی تعداد کم کر دی ہے، اب 3 کی بجائے 2 میچز کھیلے جائیں گے۔دوسری جانب کیوی کرکٹ بورڈ کے چیف ایگزیکٹو ڈیوڈ وائٹ نے کہا کہ آئی سی سی ٹیسٹ چیمپئن شپ کے قوانین کے مطابق ہر سال کم از کم 2 ہوم یا اوے ٹیسٹ سیریز کھیلیں گے کیونکہ ٹیسٹ چیمپئن شپ کیلیے صرف 2 میچز ہی شمار کیے جائیں گے۔

ینگر //سیوک ایکشن پروگرام کے تحت جموں کشمیر پولیس کی جانب سے جنوبی کشمیر کے نوجوانوں کے کھیل کود کے ہنر کو نکھارنے کیلئے پہلے مرحلے کا اسپورٹس فیسٹول کا انعقاد ہونے جارہا ہے۔ جموں و کشمیر پولیس نوجوانوںکیلئے کھیل کود کی سرگرمیوں کا انعقاد ڈسڑکٹ ، رینج اور ریاستی سطح میں منعقد کررہا ہے تاکہ نوجوان لڑکوں اور لڑکیوں کو کھیل کے میدان میں اپنے اپ کو منوانے میں ایک سٹیج فراہم ہوسکے اور مستقبل میں وہ کچھ کرسکے۔ جنوبی کشمیر اسپورٹس فیسٹول سال 2017 پہلے مرحلے کا انعقاد مورخہ 23.08.2017 سے لیکر 30.08.2017 تک ڈسڑکٹ اننت ناگ میں منعقد ہونے جارہا تھا۔ اسلئے جنوبی کشمیر کے تمام اضلاع کے ساتھ منسلک تمام ایجوکیشنل انسٹی چیوٹوں اور مقامی ٹیموں سے گزارش ہے کہ اپنا ایڈ میشن فارم اپنے اپنے ڈسڑکٹ لاین کے ڈی ۔ایس۔ پی ڈار کے آفیس سے حاصل کرسکتے ہیں اور فارم حاصل کرنے کا آخری دن مورخہ12 اِگست مقررہ کیاگیا اُ س کے بعد کوئی بھی فارم نہ لیا جائے گا۔اسپورٹس فیسٹول میں فائنل میں جگہ حاصل کرنے والے کھلاڑی جنوبی کشمیر کے دیگر اضلاع کے فائنل میں جگہ پکی کرنے والوںکے ساتھ دوسرے مرحلے کے رینج اسپورٹس فیسٹول سال 2017  مقابلہ ہوگا۔اس اسپورٹس فیسٹول میں مختلف قسم کے کھیل جیسے لڑکوں کیلئے T-20 کرکٹ ، فٹبال شارٹ ورجن ، والی بال ، کبڈی ، ٹگ آف وار ، کراٹے ، دوسو میٹر رئیس ، جیولن تھرو ، ڈسکس تھرو دو کلو، شارٹ پُٹ 4.5 Kgs اور لڑکیوں کیلئے T-20 کرکٹ ، والی بال ، کھوکھو، ویشو ، سو میٹر دوڑ ، جیولن تھرو، ڈسکس تھرو ایک کلو، شارٹ پُٹ4.5 kgs.کھیلے جائینگے۔

جدہ//بحرین کے شاہ حمد بن عیسیٰ آل خلیفہ نے دہشت گردی اور اس کے پشتیبانوں سے نمٹنے کے لیے سعودی عرب کی کوششوں کی غیر متزلزل حمایت کا اعادہ کیا ہے۔شاہِ بحرین نے جدہ میں سعودی عرب کے ولی عہد شہزادہ محمد بن سلمان سے ملاقات کی ہے اور انھوں نے دونوں ملکوں کے درمیان گہرے تاریخی تعلقات ،خطے اور عالمی سطح پر تازہ صورت حال اور باہمی دلچسپی کے امور پر تبادلہ خیال کیا ہے۔شاہ حمد نے جدہ میں اپنی آمد کے موقع پر ایک بیان میں دونوں برادر ہمسایہ ممالک کے درمیان تاریخی تعلقات کوسراہا اور کہا کہ دونوں ممالک مختلف امور کے بارے میں یکساں موقف کے حامل ہیں اور ان کے درمیان دو طرفہ تعلقات کو مسلسل فروغ مل رہا ہے۔انھوں نے بحرین کی جانب سے دہشت گردی اور اس کی مالی وسیاسی حمایت کرنے والے ممالک اور گروپوں کے خلاف سعودی عرب کے اقدامات کی غیرمتزلزل حمایت کا اعادہ کیا ہے۔انھوں نے سعودی فرمانروا شاہ سلمان بن عبدالعزیز کی عرب اور اسلامی اقوام کے درمیان اتحاد کو مضبوط بنانے اور علاقائی استحکام کے لیے مخلصانہ کوششوں کی حمایت کا بھی اظہار کیا ہے۔بحرین کی سرکاری خبررساں ایجنسی کی جانب سے جاری کردہ بیان کے مطابق شاہ حمد نے کہا:’’ہم اس بات کا اعادہ کرتے ہیں کہ پوری مسلم دنیا مملکت سعودی عرب کی اسلامی اقوام اور ان کے نصب العینوں کے دفاع کے لیے کوششوں کی حمایت کرتی ہے اور اس کے ساتھ کھڑی ہے‘‘۔انھوں نے کہا کہ وہ سعودی عرب کی جانب سے دنیا بھر سے آنے والے عازمین حج اور عمرہ کو مہیا کی جانے والی معیاری خدمات اور سہولتوں کو قدر کی نگاہ سے دیکھتے ہیں۔