چنڈی گڑھ،//پنجاب اسمبلی الیکشن کے لیے تشکیل منشور کمیٹی کے چیئرمین اور راجیہ سبھا رکن پرتاپ سنگھ باجوا نے کہا کہ پارٹی کے منشور میں سماج کے سبھی طبقا ت کی توقعات کا خیال رکھا جائے گا۔
انہوں نے آج یہاں صحافیوں کو بتایا کہ چنی حکومت نے صرف چار ماہ میں 100 وعدے پورے کیے ہیں۔ پنجاب ایک زرعی ریاست ہے لیکن ریاست میں کسانوں کی حالت اچھی نہیں ہے۔ اس وقت کے وزیر اعظم پنڈت جواہر لال نہرو کی قیادت میں پنجاب کے پہلے وزیر اعلیٰ پرتاپ سنگھ کیرون نے ریاست میں سبز انقلاب برپا کیا۔ ایسے میں پارٹی کے منشور کا مرکز بھی زراعت ہی ہوگا۔ زرعی تنوع پر زور دیا جائے گا تاکہ کسان گندم اور دھان کی فصل کے چکر سے باہر نکل سکیں۔
انہوں نے کہا کہ نوجوانوں کو روزگار دینا کانگریس کی دوسری سب سے بڑی ترجیح ہوگی۔ منشور میں خواتین کو بااختیار بنانے پر بھی زور دیا جائے گا۔ ریاست میں صنعتی ترقی کے لیے پارٹی کی حکمت عملی کا ذکر کرتے ہوئے انہوں نے کہا کہ بندرگاہ پنجاب سے بہت دور ہونے کی وجہ سے صنعت کو نقصان پہنچتا ہے۔ اس کے لیے حکومت صنعت کو رعایت دے گی تاکہ صنعت پھلے پھولے اور ریاست میں معاشی ترقی سمیت روزگار کے مواقع پیدا ہوں۔ کانگریس شہری اور دیہی علاقوں میں انفراسٹرکچر بھی تیار کرے گی۔
مسٹر باجوانے کہا کہ کھیلوں اور ثقافتی ترقی پر بھی زور دیا جائے گا تاکہ ریاست سے نئے کھلاڑی ابھریں اور ہماری ثقافت دور دراز تک پھیلے۔ منشور کمیٹی کی طرف سے وزیر اعلیٰ اور پنجاب کانگریس صدر کے ساتھ الگ الگ میٹنگیں بھی کی گئی ہیں۔ پارٹی کا منشور جلد پیش کیا جائے گا۔ ہمارا منشور بند دروازے کی دستاویز نہیں بلکہ عوام سے مشاورت کے بعد تیار کیا جا رہا ہے جو پنجاب کے عوام کی امنگوں کا حقیقی آئینہ دار ہو گا۔
ان کے ساتھ موجود دہلی کے سابق ایم ایل اے آدیش شاستری نے دہلی کے وزیر اعلی اروند کیجریوال اور ان کی پارٹی کے جھوٹ کو بے نقاب کیا۔ انہوں نے الزام لگایا کہ عام آدمی پارٹی آر ایس ایس کی بی ٹیم ہے۔ عام آدمی پارٹی دہلی کے لوگوں سے کیا گیا ایک بھی وعدہ پورا نہیں کر پائی ہے اور پنجاب میں جھوٹ پھیلا رہی ہے۔
