جنوری 22 اور 23 کو برف باری کے ایک اور مرحلے کا امکان ہے: سونم لوٹس
یواین آئی
سرینگر؍؍وادی کشمیر میں 22 اور 23 جنوری کو درمیانہ درجے کی برف باری کا امکان ہے جبکہ بدھ کے روز میدانی علاقوں میں ہلکی برف باری ہو سکتی ہے۔محکمہ موسمیات کے سربراہ سونم لوٹس نے یو این آئی اردو کو بتایا کہ بدھ کے روز وادی کشمیر کے میدانی علاقوں میں ایک سے دو سینٹی میٹر برف باری ہو سکتی ہے۔انہوں نے بتایا کہ 20 اور 21 جنوری کے روز موسم خشک رہے گا۔سونم لوٹس نے کہا کہ 22 اور 23 جنوری کو وادی کشمیرمیں برف باری کا امکان ہے جس دوران پہاڑی علاقوں میں درمیانہ درجے کی برفباری ہو گی جبکہ میدانی علاقوں میں اس دوران معمولی برف باری کا امکان ہے۔انہوں نے مزید بتایا کہ فی الحال وادی کشمیر میں بھاری برف باری کا کوئی امکان نظر نہیں آرہا ہے۔بتادیں کہ پیر اور منگل کی درمیانی رات کو وادی کشمیر کے سیاحتی مقامات پر تازہ برف باری ہوئی ہے۔وادی کشمیر میں مطلع ابر آلود رہنے سے گرچہ شبانہ درجہ حرارت میں گراوٹ درج ہوئی ہے تاہم محکمہ موسمیات کے ایک ترجمان کی پیش گوئی کے مطابق وادی میں 24 جنوری تک موسمی صورتحال جوں کی توں رہنے کا امکان ہے۔انہوں نے کہا کہ اس دوران 19 جنوری کو وادی میں ہلکے سے درمیانی درجے کی برف باری متوقع ہے جبکہ باقی ایام کے دوران موسم ابر آلود رہ سکتا ہے اور کہیں کہیں ہلکی برف باری کا بھی امکان ہے۔گرمائی دارلحکومت سری نگر میں کم سے کم درجہ حرارت 1.1 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت 1.0 ڈگری سینٹی گریڈ ریکارڈ ہوا تھا۔سری نگر میں گذشتہ چوبیس گھنٹوں کے دوران 0.2 ملی میٹر بارش ریکارڈ ہوئی ہے۔بتادیں کہ سری نگر میں 18دسمبر کو رواں موسم کی سرد ترین رات درج ہوئی تھی جب کم سے کم درجہ حرارت منفی6.0 ڈگری سینٹی گریڈ ریکارڈ ہوا تھا۔وادی کے مشہور زمانہ سیاحتی مقام گلمرگ میں کم سے کم درجہ حرارت منفی6.0 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی 4.6 ڈگری سینٹی گریڈ ریکارڈ ہوا تھا۔گلمرگ میں گذشتہ چوبیس گھنٹوں کے دوران 4.4 ملی میٹر برف وباراں ریکارڈ ہوا ہے۔وادی کے دوسرے مشہور سیاحتی مقام پہلگام میں کم سے کم درجہ حرارت منفی0.7 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی3.6 ڈگری سینٹی گریڈ ریکارڈ ہوا تھا۔پہلگام میں گذشتہ چوبیس گھنٹوں کے دوران 3.4 ملی میٹر برف و باراں ریکارڈ ہوا ہے۔سرحدی ضلع کپوارہ میں کم سے کم درجہ حرارت 0.2 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت 0.5 ڈگری سینٹی گریڈ ریکارڈ ہوا تھا۔کپوارہ میں گذشتہ چوبیس گھنٹوں کے دوران 9.2 ملی میٹر بارش ریکارڈ ہوئی ہے۔گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت 0.2 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی1.0 ڈگری سینٹی گریڈ ریکارڈ ہوا تھا۔قاضی گنڈ میں گذشتہ چوبیس گھنٹوں کے دوران 4.4 ملی میٹر بارش ریکارڈ ہوئی ہے۔لداخ یونین ٹریٹری کے قصبہ دراس جو سائبیریا کے بعد دنیا کا دوسرا سرد ترین علاقہ ہے، میں کم سے کم درجہ حرارت منفی16.1 ڈگری سینٹی گریڈ ریکارڈ کیا گیا جبکہ ضلع لیہہ یں کم سے کم درجہ حرارت منفی11.0 ڈگری سینٹی گریڈ اور ضلع کرگل میں کم سے کم درجہ حرارت منفی12.3 ڈگری سینٹی گریڈ ریکارد کیا گیا۔قابل ذکر ہے کہ وادی میں سردیوں کا بادشاہ چالیس روزہ چلہ کلان بر سر اقتدار ہے جو ٹھٹھرتی سردیوں اور بھاری برف باری کے لئے اپنا منفرد مقام رکھتا ہے۔چلہ کلان کی حکومت 31 جنوری کو اختتام پذیر ہوگی اور اس کے بعد بیس روزہ چلہ خورد تخت نشین ہوگا گرچہ اس کی حکومت کے دوران بھی بھاری برف باری کو خارج از امکان قرار نہیں دیا جا سکتا ہے تاہم سردی کی شدت میں بتدریج کمی ہی واقع ہوگی۔
