یواین آئی
نئی دہلی؍راشٹریہ سویم سیوک سنگھ اور اس کی ماتحت تنظیموں کے مابین رابطہ کے لئے تنظیمی وزرا کی دو دن کی غیررسمی میٹنگ جمعہ کو ناگپور میں شروع ہوگی جس میں بھارتیہ جنتا پارٹی (بی جے پی) کے قومی تنظیمی جنرل سکریٹری بی ایل سنتوش بھی حصہ لیں گے۔سنگھ کے کل ہند پرچار پرمکھ سنیل آمبیکر نے آج یہاں بتایا کہ کورونا وبا کی وجہ سے گزشتہ برس کی طرح اس بار بھی اس میٹنگ کا اہتمام چھوٹی سطح پر کیا جارہا ہے۔مسٹر آمبیکر نے کہاکہ ناگپور میں، راشٹریہ سویم سیوک سنگھ کی چھوٹی عمومی غیررسمی رابطہ میٹنگ تین چار ستمبر 2021کو ہورہی ہے۔ویسے ہر سال ستمبر میں ایک وسیع اجلاس ہوتا ہے لیکن کورونا کی صورتحال میں پچھلی بار چھوٹی میٹنگ ہوئی تھی اور اس سال بھی چھوٹی میٹنگ ہی ہورہی ہے۔ کورونا سے صورتحال معمول پر آنے پر غالباً اگلے برس کے شروع میں وسیع اجلاس ہوگا۔انہوں نے بتایا کہ میٹنگ میں راشٹریہ سویم سیوک سنگھ کے کچھ کل سطح کے ہند عہدیداران اور کچھ مختلف تنظیموں جیسے وشو ہندو پریشد، ودیارتھی پریشد، بھارتیہ مزدو ر سنگھ، ودیا بھارتی وغیرہ کے کل ہند کے تنظیمی وزرا موجود رہیں گے۔سنگھ کے ذرائع کے مطابق بی جے پی کے قومی تنظیمی جنرل سکریٹری بی ایل سنتوش بھی پارٹی تنظیموں کاموں کا حساب کتاب لیکر میٹنگ میں حصہ لیں گے۔
