گورنمنٹ پرائمری سکول ہنڈیاں مسجد کی چہار دیواری کی جائے:الطاف بالاکوٹوی
سرفرازقادری
مینڈھر//سب ڈویژن مینڈھر میں سرکاری اسکولوں کے طلاب کو پریشانیوں کا سامنا کرناپڑتاہے۔کوئی اسکول نامکمل تو کوئی فرش وپلستر کا منتظر ،کہیں کھیل کے میدان کی کمی محسوس کی جا رہی ہے ۔ اس ضمن میں الطاف بالاکوٹوی نے لازوال سے بات کرتے ہوئے بتایاکہ گورنمنٹ پرائمری سکول ہنڈیاں مسجد بالاکوٹ میں کھیل کامیدان نہیں کہ جس کی وجہ سے پرائمری اسکول بنڈیاں مسجد کے طلاب کو کھیل کود میں دقتوں کاسامنا کرنا پڑتاہے۔انہوں نے کہا کہ بچوں کو پڑھائی کے ساتھ ساتھ کھیل کود کی بھی ضرورت ہے۔ انہوں نے مزید کہاکہ پرائمری سکول ہنڈیاں مسجد کے ساتھ ایک سڑک ہے جو پی ایم جی ایس وائی کے تحت نکالی گئی تھی اورسکول کے ساتھ سڑک والی جانب سے بارش کے دوران زمین کھسکتی رہتی ہے جس کی وجہ سے اسکول کی عمارت کو خطرہ ہے۔ انہوں نے کہاکہ جب لوگ اپنے گھروں کیلئے ریت بجڑی لاتے ہیں تو اسکول کے صحن میں ڈھیر کرتے ہیں جو طلباء کیلئے ایک مصیبت ہے۔ انہوں نے لیفٹیننٹ گورنر انتظامیہ سے اپیل کی کہ گورنمنٹ ہنڈیاں مسجد اسکول کی چہاردیواری کی جائے تاکہ اسکولی عمارت کا خطرہ ٹل سکے اورسکول کے ساتھ کھیل کا میدان بھی بنایا جائے تاکہ اسکولی بچوں کو کھیل کود میں دقتوں کا سامنا نا کرنا پڑے۔
