پنجگرائیں میں عوامی اجتماع، نو منتخب ڈی ڈی سی کونسلر شمیم بیگم اور بی ڈی سی چیئرمین نگروٹہ چوہدری رحمت علی نے بھی کی شرکت
لازوال ڈیسک
نگروٹہ ؍؍نیشنل کانفرنس کے صوبائی صدر دیویندر سنگھ رانا نے یہاں نگروٹہ کے پنج گرائیں، کٹل بٹال وغیرہ میں عوامی اجتماعات سے تبادلہ خیال کرتے ہوئے حکومت پر زور دیا کہ مقامی بے روزگار نوجوانوں کو انڈین انسٹی چوٹ آف ٹکنالوجی (آئی آئی ٹی) ، انڈین انسٹی چوٹ آف مینجمنٹ (آئی آئی ایم) ، آل انڈیا انسٹی چوٹ آف میڈیکل سائنسز (اے آئی ایم ایس) کے علاوہ دیگر مرکزی منصوبہ جات میں شامل کیا جائے۔انہوں نے کہا کہ بے روزگاری کے بڑھتے ہوئے بحران کو مدنظر رکھتے ہوئے جموں وکشمیر میں فی الحال عمل درآمد مرکزی منصوبہ جات میں نوجوانوں کو لگایا جائے۔موصوف نے کہا کہ آئی آئی ٹی،آئی آئی ایم، ایمس اور بینکوں جیسے اداروں میں مقامی بے روزگار نوجوانوں کو ایڈجسٹ کرنے کی بے پناہ صلاحیت موجود ہے ، لہٰذا ہنر مند اور نیم ہنر مند زمرے اور کم از کم پچاس فیصد مقامی نوجوانوں کی ایڈجسٹمنٹ کو یقینی بنانے کے لئے بھرپور اقدامات اٹھانے کی ضرورت ہے۔اس موقع پر نو منتخب ڈی ڈی سی کونسلر شمیم بیگم اور بی ڈی سی چیئرمین نگروٹہ چوہدری رحمت علی نے بھی جلسہ عام سے بھی تبادلہ خیال کیا۔وہیں رانا نے کہا کہ حالیہ برسوں میں بے روزگاری نے تعلیم یافتہ بے روزگاروں کے علاوہ ہنرمند اور غیر ہنر مند افرادی قوت کو پریشان کیا ہے۔ انہوں نے کہا کہ وبائی مرض کے بعد نجی شعبے میں بھی صورتحال مزید خراب ہوگئی ہے جس نے بے روزگاری میں مزید اضافہ کردیا اور اس منظرنامے سے نمٹنے کے لئے کچھ میکانزم لازمی ہے۔رانا نے کہا کہ صنعتوں اور کارپوریٹ سیکٹر کی کمی کی وجہ سے ملازمتوں کی محدود راہیں بھی ہیں اور اس لئے کچھ عقلیت کو اپنانا ہوگا۔صوبائی صدر نے حالیہ انتخابات کے دوران عوام کو بڑے پیمانے پر اپنے حق رائے دہی کا استعمال کرنے اور نیشنل کانفرنس پر اعتماد بحال کرنے پر عوام کا شکریہ ادا کیا۔انہوں نے اس موقع نو منتخب ڈی ڈی سی کونسلرشمیم بیگم کو مبارکباد بھی پیش کی اور امید ظاہر کی کہ وہ لوگوں کی توقعات پر اتریں گی اور ڈنسال کی مجموعی ترقی کو یقینی بنائیں گی۔اس موقع پر سرپنچ تھورو رام ،سرپنچ ریکھا جموال ،سماجی کارکن چوہدری نور محمد،سابق سرپنچ کلبھوشن سنگھ ،سابق سرپنچ جوگندر لال ،ہنس راج ،، اشوک کمار،صادق،شوکی، ستیش و دیگران موجود تھے۔
