سب سے پہلے تقریبا تین کروڑ طبی عملہ اور صف اول میں تعینات اہلکاروں کو ٹیکے لگائے جائیں گے
ؒلازوال ڈیسک
نئی دہلی؍؍ملک میں کورونا وائرس کے خلاف ٹیکہ کاری مہم 16 جنوری سے شروع ہوگی اور سب سے پہلے تقریبا تین کروڑ طبی عملہ اور صف اول میں تعینات اہلکاروں کو ٹیکے لگائے جائیں گے۔پی ایم مودی کی صدارت میں ہوئی ایک اعلیٰ سطحی میٹنگ کے دوران فیصلہ لیا گیا کہ 16 جنوری سے کورونا ٹیکہ کاری کا آغاز ہوگا اور شروعاتی مراحل میں طبی اہلکاروں اور فرنٹ لائن ورکرس کو ترجیح دی جائے گی۔ہفتہ کے روز پی ایم نریندر مودی نے کووڈ ٹیکہ کاری کے لیے ریاستی سطح پر ہوئی تیاریوں کا جائزہ لینے کے لیے اعلیٰ سطحی میٹنگ کی صدارت کی۔ اس میٹنگ میں کابینہ سکریٹری، پرنسپل سکریٹری اور ہیلتھ سکریٹری کے علاوہ دوسرے افسران نے بھی شرکت کی۔ ایک رپورٹ کے مطابق میٹنگ میں فیصلہ لیا گیا کہ 16 جنوری سے کورونا ویکسین لگائی جائے گی۔ ٹیکہ کاری پروگرام کے شروعاتی مراحل میں طبی اہلکاروں اور فرنٹ لائن ورکرس ترجیح دی جائے گی جن کی ممکنہ تعداد تقریباً 3 کروڑ ہے۔خبروں کے مطابق طبی اہلکاروں اور فرنٹ لائن ورکرس کے بعد ہی عام شہریوں کے لیے ٹیکہ کاری کی مہم شروع ہوگی۔ عوامی طور پر ٹیکہ کاری مہم شروع ہونے کے بعد 50 سال سے اوپر کی عمر والے اور سنگین بیماریوں میں مبتلا لوگوں کو پہلے ٹیکہ لگایا جائے گا۔ ایک اندازے کے مطابق بتایا جاتا ہے کہ ایسے افراد کی تعداد تقریباً 27 کروڑ کے آس پاس ہوگی۔ اس کے بعد ہی بقیہ لوگوں میں ٹیکہ کاری ہوگی۔قابل ذکر ہے کہ پی آئی بی (پریس انفارمیشن بیورو) کی جانب سے دستیاب کرائی گئی جانکاری کے مطابق مرکزی حکومت نے لوہڑی، مکر سنکرانتی، پونگل اور ماگھ بیہو کے بعد ٹیکہ کاری مہم شروع کرنے کا فیصلہ لیا ہے۔ ہندوستان میں حالانکہ کورونا کا قہر کچھ قابو میں آیا ہے لیکن پھر بھی روزانہ تقریباً 20 ہزار نئے معاملے سامنے آ رہے ہیں جس کی وجہ سے احتیاطی اقدامات ہر سطح پر کیے جانے کی تلقین حکومت نے کی ہوئی ہے۔حکومت کی طرف سے یہاں ہفتہ کے روز جاری ہونے والے بیان میں کہا گیا ہے کہ وزیر اعظم نریندر مودی نے کووڈ۔19 کی صورتحال اور ویکسین کی تیاریوں کا جائزہ لینے کے بعد یہ فیصلہ کیا ہے۔ بیان کے مطابق تفصیلی جائزہ لینے کے بعد فیصلہ کیا گیا ہے کہ آنے والے تہواروں کے پیش نظر لوہری، مکر سنکرانتی، پونگل، ماگھ بیہو وغیرہ کے بعد 16 جنوری 2021 سے ٹیکے لگانے کا کام شروع کیا جائے گا۔ہیلتھ سروس اور فرنٹ لائن پر تعینات افراد کے بعد 50 سال سے زیادہ عمر کے افراد اور 50 سال سے کم عمر کے ان افراد کو ویکسین کے لیے ترجیح دی جائے گی جو کسی سنگین بیماری میں مبتلا ہیں۔ ایسے لوگوں کی تعداد تقریبا 27 کروڑ ہے۔حکومت نے کہا کہ "قومی ریگولیٹر نے دو ٹیکوں (کوویشیلڈ اور کوویکسین) کے ہنگامی استعمال کی اجازت دے دی ہے، جو حفاظت اور مدافعتی نظام کی کسوٹی پر کھرا اترے ہیں۔
