’مجبوریوں سے اُوپر اٹھ جائیں‘

ہندوستان اور پاکستان کی قیادت کو انسانیت کی بنیادپرباتچیت شروع کرنی چاہئے: محبوبہ مفتی
یواین آئی

سرینگر؍؍پی ڈی پی صدر اور سابق وزیر اعلیٰ محبوبہ مفتی نے گذشتہ روز لائن آف کنٹرول پر ہونے والے انسانی جانوں کے زیاں پر اظہار افسوس کرتے ہوئے کہا کہ ہندوستان اور پاکستان کی قیادت کو سیاسی مجبوریوں سے اوپر اٹھ کر انسانی بنیادوں پر بات چیت شروع کرنی چاہئے۔انہوں نے کہا کہ سابق وزیر اعظم اٹل بہاری واجپائی اور پاکستانی صدر جنرل پرویز مشرف کے درمیان طے پانے والے جنگ بندی معاہدے کی بحالی اس کے لئے اچھی شروعات ثابت ہوسکتی ہیں۔بتادیں کہ شمالی کشمیر سے لے کر جموں کے ضلع پونچھ تک لائن آف کنٹرول پر جمعے کو ہندستان اور پاکستان کی فوج کے درمیان شدید گولہ باری کے نتیجے میں بی ایس ایف کے ایک سب انسپکٹر سمیت پانچ اہلکار اور چار شہری ہلاک جبکہ نو اہلکار اور پندرہ شہری زخمی ہوگئے۔محبوبہ مفتی نے ایل او سی پر انسانی جانوں کے زیاں پر اظہار افسوس کرتے ہوئے اپنی ایک ٹویٹ میں کہا: ‘ایل او سی کے آر پار انسانوں جانوں کے زیاں پر افسردہ ہوں۔ ہندوستان اور پاکستان کی قیادت کو سیاسی مجبوریوں سے بالاتر ہو کر بات چیت شروع کرنی چاہئے۔ واجپائی جی اور مشرف صاحب کے درمیان طے پانے والے جنگ بندی معاہدے کو بحال کرنا اس ضمن میں اچھی شروعات ثابت ہوسکتی ہیں’۔دریں اثنا پیپلز کانفرنس کے صدر سجاد غنی لون نے اپنے ایک ٹویٹ میں کہا ہے: ‘گولہ باری سے اوڑی، ٹنگڈار اور پونچھ میں ایک بار پھر انسانی جانیں ضائع ہوئیں۔ اس جدید طرز کی بربریت کی مذمت کے لئے الفاظ کافی نہیں ہیں۔ امید کرتا ہوں کہ انتظامیہ متاثرین کو ریلیف فراہم کرے گی۔ میری دعائیں اس بد نصیب علاقے کے لوگوں کے ساتھ ہیں’۔