نعرے بازی کی ،ڈاکٹر فاروق عبداللہ اور محبوبہ مفتی کے پتلے نظر آتش کئے
یو این آئی
جموں؍؍ ضلع جموں کے بٹھنڈی علاقے میں نیشنل کانفرنس کے صدر اور سابق وزیر اعلیٰ ڈاکٹر فاروق عبداللہ کی رہائش گاہ کے سامنے پیر کے روز اس وقت صورتحال کشیدہ رخ اختیار کر گئی جب موصوف کے پتلے نذر آتش کرنے اور گپکار اعلامیہ کے خلاف جم کر نعرہ بازی کرنے پر اکھل بھارتیہ ودیارتھی پریشد ( اے بے وی پی) کے کارکنوں اور نیشنل کانفرنس کے کارکنوں کے درمیان شدید لفظی جنگ کا میدان گرم ہوگیا۔تاہم پولیس کی بھاری جمعیت نے وہاں پہنچ کر بروقت کارروائی کر کے ماحول کو مزید بگڑنے سے بچایا۔جموں کے ضلع بٹھنڈی علاقے میں پیر کے روز اے بی وی پی کے کارکن ہاتھوں میں ترنگے لئے نیشنل کانفرنس کے صدر و سابق وزیر اعلیٰ ڈاکٹر فاروق عبداللہ کی رہائش گاہ کے باہر گپکار اعلامیہ کے خلاف احتجاج کرنے لگے۔احتجاجیوں نے ڈاکٹر فاروق عبداللہ اور پی ڈی پی صدر محبوبہ مفتی کے پتلے نذر آتش کئے اور اس کے بعد فاروق عبداللہ کی رہائش گاہ پر ترنگا لہرانے کی کوشش کی۔احتجاجی ‘دیش کے غداروں کو، گولی مارو۔۔۔۔۔ کو’، ‘ڈاکٹر فاروق مردہ بار مردہ باد، ‘محبوبہ مفتی مردہ باد مردہ باد’ جیسے نعرے لگا رہے تھے۔اس موقع پر ایک اے بی وی پی کارکن نے میڈیا کو بتایا: ‘گپکار گینگ کے لوگ لگاتار بیان بازی کر کے ملک کے نوجوانوں کو بھڑکانا چاہتے ہیں’۔انہوں نے کہا کہ محبوبہ مفتی جب وزیر اعلیٰ تھیں تو ان کو ملک کا جھنڈا پسند تھا لیکن آج وہ کہتی ہیں کہ اس کا اٹھانے والا کوئی نہیں ہے۔موصوف نے کہا کہ اب یہ لوگ کہتے ہیں کہ چین کی مدد سے دفعہ 370 واپس لائیں گے۔دریں اثنا عام لوگ اور نیشنل کانفرنس کے کارکن موقع پر جمع ہوئے اور طرفین کے درمیان لفظی جنگ شروع ہوئی۔عام لوگوں اور نیشنل کانفرنس کے کارکنوں نے بھی جم کر جوابی نعرہ بازی کر کے اے بی وی پی کی اس حرکت کو ماحول خراب کرنے کی ایک کوشش قرار دیا۔ایک شہری نے کہا کہ یہ ماحول کو خراب کرنے کی ایک کوشش ہے، اے بی وی پی والے یہاں فساد کھڑا کرنا چاہتے ہیں۔انہوں نے کہا: ‘یہ لوگ ہمیں کیا کہیں گے، ہم بھی ہندوستانی ہیں اور ہم اپنے مکانوں کے چھتوں پر یوم آزادی یا یوم جمہوریہ کے مواقع پر ترنگا لہراتے ہیں’۔ایک اور شہری نے کہا کہ ہم یہاں ہمیشہ سے بھائی چارے سے رہتے ہیں اور قومی جھنڈا بھی اٹھاتے ہیں یہ ان لوگوں کی یہاں ماحول کو خراب کرنے کی ایک سازش ہے۔
