جموں میں محکمہ جل شکتی کے عارضی ملازمین سراپا احتجاج
یواین آئی
جموں؍؍محکمہ جل شکتی میں کام کرنے والے عارضی ملازمین نے بدھ کے روز اپنے مطالبوں کو لے کر زائد از ایک ہفتے سے جاری ہڑتال میں 72 گھنٹوں کی مزید توسیع کی ہے۔مذکورہ محکمے کے یہ عارضی ملازمین گذشتہ گیارہ دنوں سے صوبہ جموں میں اپنے مطالبات جن میں نوکریوں کی مستقلی، منیمم ویجز ایکٹ کا اطلاق اور تنخواہوں کی واگذاری قبل ذکر ہیں، کو لے کر برسر احتجاج ہیں۔احتجاجی بدھ کو یہاں محکمہ جل شکتی کے دفتر کے احاطے میں احتجاج درج کر رہے تھے اور اپنے حقوق کے حق میں جم کر نعرہ بازی کر رہے تھے۔اس موقع پر پی ایچ ای ایمپلائز یونائیٹڈ فرنٹ کے ایک عہدیدار نے میڈیا کو بتایا کہ ہم نے ہڑتال میں مزید 72 گھنٹوں کی توسیع کی ہے۔انہوں نے کہا: ‘ہم نے ہڑتال میں 72 گھنٹوں کی توسیع کی ہے اور اس کی ذمہ داری لیفٹیننٹ گورنر پر عائد ہے’۔موصوف نے کہا کہ ہم دن رات محنت کر کے جموں و کشمیر کے لوگوں کے گھروں تک پانی پہنچاتے ہیں لیکن سرکار کے پاس ہمیں دینے کے لئے کچھ بھی نہیں ہے۔انہوں نے کہا کہ ہم نے اپنے مطالبات کمشنر صاحب کے سامنے رکھے تو انہوں نے ہم سے کچھ وقت مانگا اور ہڑتال معطل کرنے کو کہا۔موصوف نے کہا کہ گذشتہ 26 برسوں سے ہمیں صرف جھوٹے وعدوں سے بہلایا جاتا رہا ہے۔دریں اثنا جموں و کشمیر کیجول ڈیلی ویجرس فورم کے صدر سجاد احمد پرے نے یو این آئی اردو کو بتایا کہ ہماری لیفٹیننٹ گورنر کے ساتھ میٹنگ ہونے والی ہے اور اسی میٹنگ کے بعد ہم اپنی حکمت عملی طے کریں گے۔انہوں نے کہا کہ میٹنگ میں اگر مثبت جواب ملتا ہے تو ٹھیک ورنہ ہم بھی صوبہ کشمیر میں ہڑتال کا اعلان کریں گے۔بتادیں کہ کشمیر پبلک ہیلتھ انجینئرنگ (پی ایچ ای) جوائنٹ ایمپلائز ایسوسی ایشن نے جموں کے محکمہ پی ایچ ای کے عارضی ملازمین کے ہڑتال کی حمایت میں3 اکتوبر کو یہاں پریس کالونی میں احتجاج درج کیا تھا۔
