سری نگر، 7 اکتوبر (یو این آئی) جنوبی ضلع شوپیاں کے سوگن زینہ پورہ میں ہونے والے ایک شبانہ مسلح تصادم میں دو جنگجو مارے گئے ہیں۔
جموں و کشمیر پولیس کے ایک ترجمان نے بتایا کہ شوپیاں کے سوگن زینہ پورہ میں ایک مسلح تصادم میں دو جنگجو مارے گئے۔
انہوں نے مزید کہا کہ سکیورٹی فورسز کے محاصرے میں پھنسنے والے ان جنگجوئوں کو خود سپردگی اختیار کرنے کی پیشکش کی گئی تھی جو انہوں نے ٹھکرا دی۔
سرکاری ذرائع نے تفصیلات فراہم کرتے ہوئے کہا کہ سوگن زینہ پورہ میں جنگجوئوں کی موجودگی سے متعلق خفیہ اطلاع ملنے پر پولیس، فوج کی 44 راشٹریہ رائفلز اور سی آر پی ایف نے مذکورہ علاقے میں گذشتہ شام کارڈن اینڈ سرچ آپریشن شروع کیا۔
انہوں نے کہا کہ ایک مشتبہ جگہ کو محاصرے میں لینے کے دوران وہاں موجود جنگجوئوں نے فائرنگ کی جس کے بعد طرفین کے درمیان مسلح تصادم چھڑ گیا جس میں دو جنگجو مارے گئے۔
انتظامیہ نے احتیاط کے طور ضلع شوپیاں میں موبائل انٹرنیٹ خدمات منقطع کر دی ہیں نیز سکیورٹی فورسز کی اضافی نفری تعینات کر دی ہے۔
قبل ازیں وسطی ضلع گاندربل میں گذشتہ شام بی جے پی کے ایک کارکن پر حملے کے بعد ان کے ذاتی محاظین اور جنگجوئوں کے درمیان فائرنگ کے تبادلے میں ایک جنگجو اور ایک پولیس اہلکار جاں بحق ہوئے۔
حملے میں جہاں بی جے پی کارکن غلام قادر راتھر بال بال بچ گئے تاہم ان کے ذاتی محافظ الطاف حسین ساکن عید گاہ سری نگر گولی لگنے کے بعد زخموں کی تاب نہ لاتے ہوئے دم توڑ بیٹھے۔
