یواین آئی
نئی دہلی؍؍کورونا وائرس (کووڈ-19) کی عالمی وبا سے نمٹنے کے لئے نافذ کیے گئے لاک ڈاؤن کی وجہ سے ملک کی مجموعی گھریلو پیداوار (جی ڈی پی) اپریل سے جون تک رواں مالی سال کی سہ ماہی کے دوران صفر سے 23.9 فیصد نیچے تک جاچکی ہے۔مرکزی دفتر شماریات کی طرف سے آج یہاں جاری ہونے والے جی ڈی پی کے سہ ماہی اعدادوشمار کے مطابق گزشتہ مالی سال کے اسی عرصے میں یہ شرح 5.2 فیصد تھی۔ لاک ڈاؤن کے باعث ملک میں معاشی سرگرمیاں مکمل طور پر بند ہوگئی تھیں۔ اس کے بعد حکومت نے سماجی فاصلے کے اصولوں پر عمل پیرا ہوکر مرحلہ وار طورپرمینوفیکچرنگ سمیت مختلف سرگرمیوں کو دوبارہ شروع کرنے کی اجازت دی تھی، لیکن ابھی تک تمام شعبوں میں کورونا وائرس سے پہلے کی طرح کام کاج نہیں ہورہے ہیں۔سرکاری اعدادوشمار کے مطابق رواں مالی سال کی پہلی سہ ماہی میں ملک کی جی ڈی پی 2689556 کروڑ روپے رہی ہے، جو گزشتہ مالی سال کے اسی عرصہ کے 3535267 کروڑ روپے سے 23.9 فیصد کم ہے۔ اس طرح سے ملک کی جی ڈی پی کی شرح نمو صفر سے 23.9 فیصد سے نیچے رہی ہے۔سرکاری بیان میں کہا گیا ہے کہ پہلی سہ ماہی کے تخمینے جون 2020 میں ختم ہونے والے ربیع سیزن کی زراعتی پیداوار پر مبنی ہیں۔
