یواین آئی
سری نگر؍؍جموں وکشمیر کی گرمائی دارالحکومت سری نگر اور پاکستان زیر قبضہ کشمیر کی دارالحکومت مظفرآباد کے درمیان چلنے والی ہفتہ وار ’کاروان امن‘ بس سروس پیر کو عیدالاضحی کے پیش نظر معطل کی گئی۔ سرکاری ذرائع نے یو این آئی کو بتایا ’کاروان امن بس سروس کو آج عیدالاضحی کے پیش نظر معطل کیا گیا ہے‘۔ انہوں نے بتایا ’ہمیں سرحد پار پاکستان زیر قبضہ کشمیر کی انتظامیہ سے ایک پیغام موصول ہوا جس میں عیدالاضحی کے پیش نظر بس سروس کو آج معطل رکھنے کی درخواست کی گئی‘۔ سرکاری ذرائع نے بتایا کہ طرفین نے بعد ازاں بس سروس کو معطل کرنے کا فیصلہ باہمی اتفاق رائے سے لیا ۔ انہوں نے بتایا کہ جو مسافر اس ہفتہ وار بس سے آج سفر کرنے والے تھے، کو اس فیصلے سے آگاہ کیا گیا ہے۔ انہوں نے بتایا کہ ان مسافروں کو اب اگلے ہفتے چلنے والی بس میں ایڈجسٹ کیا جائے گا۔ سری نگر اور مظفرآباد کے درمیان چلنے والی اس ہفتہ وار بس سروس کا آغاز 7 اپریل 2005 کو ہوا تھا اور تب سے اِس کے ذریعے ہزاروں لوگ آرپار اپنے عزیز واقارب سے ملے ہیں۔
