یاترا متاثر ہونے سے ہمارا کاروبار ٹھپ ہوگیا ہے: جموں کے دکاندار
یواین آئی
جموں؍؍کورونا وبا کے پیش نظر سالانہ امر ناتھ جی یاترا پر آنے والے یاتریوں کی تعداد میں کمی اور ویشنو دیوی یاترا بند ہونے سے جموں کے دکانداروں کا کاروبار از حد متاثر ہوا ہے۔دکانداروں کا کہنا ہے کہ ان کا کاروبار یاتریوں اور سیاحوں کی آمد پر ہی منحصر ہے اگر یہ لوگ نہیں آتے ہیں تو ہمارا کاروبار ٹھپ ہوجاتا ہے۔ایک دکاندار نے بتایا کہ آج ہمارے کاروبار کا سیزن عروج پر ہوتا تھا لیکن امسال ہم بیٹھے ہیں۔انہوں نے کہا: ‘شری امرناتھ جی یاترا کا سیزن شروع ہوا ہے آج ہمارا کاروبار بام عروج پر ہوتا تھا لیکن امسال ہم بیٹھے ہوئے ہیں، ہمارا مال دکانوں میں ہی خراب ہو رہا ہے’۔موصوف نے کہا کہ ہم اگر دکانیں کھولتے بھی لیکن کئی بار شام کو خالی ہاتھ گھر واپس لوٹنا پڑتا ہے۔ایک اور دکاندار نے کہا کہ ہمارا کاروبار یاتریوں اور سیاحوں پر منحصر ہے۔انہوں نے کہا: ‘ہمارے کاروبار کا انحصار یاتریوں اور سیاحوں کی آمد پر منحصر ہے مقامی لوگوں پر نہیں۔ جب یہ لوگ نہیں آتے ہیں تو ہمارا بزنس ٹھپ ہوجاتا ہے’۔موصوف نے کہا کہ یاترا کے ایام کے دوران ہم بیس سے پچیس ہزار روپے تک روزانہ سیل کرتے تھے لیکن آج تو ہم بے کار بیٹھے رہتے ہیں۔انہوں نے کہا امر ناتھ جی یاترا میں یاتریوں کی کمی اور ویشنو دیوی یاترا بند ہونے سے ہمارا کاروبار تباہی کے دہانے پر پہنچ گیا ہے۔
