یو این آئی
جے پور؍؍راجستھان میں 19جون کو راجیہ سبھا کی تین سیٹوں کے لئے ہورہے انتخاب میں چار امیدواروں کی درمیان مقابلہ ہوگا۔اس سے قبل یہ انتخاب 26مارچ کو ہونے والے تھے لیکن کورونا وائرس کے سبب ملک گیر لاک ڈاؤن سے اس کو ملتوی کردیا گیا تھا۔الیکشن کمیشن نے 17ریاستوں میں 55نشستوں کے لئے انتخاب کا اعلان کیا تھا اس میں دس ریاستوں میں بلامقابلہ سیٹیں بھری تھیں۔جبکہ سات ریاستوں کے انتخابات ملتوی ہوگئے تھے ،ان میں راجستھان کی تین سیٹیں بھی شامل ہیں۔اس الیکشن میں کانگریس نے ،کے سی وینوگوپال اور نیرج ڈانگی کو امیدوار بنایاہے ،جبکہ بی جے پی سے راجندرگہلوت اور اونکار سنگھ لکھاوت امیدوار ہیں۔اسمبلی میں کانگریس کی تعداد کی طاقت کے حساب سے اس کی دوسیٹوں پر جیت طے مانی جارہی ہے اور تیسری سیٹ بی جے پی کے کھاتے میں جائے گی۔بی جے پی نے مزید ایک امیدوار اونکار سنگھ لکھاوت کو چناوی میدان میں اتارکر کانگریس کو کمزور کرنے کا منصوبہ بنایا ہے ،جس سے الیکشن دلچسپ ہوگیا ہے ۔راجیہ سبھا الیکشن کے تحت 19جون کو صبح نو بجے سے شام چار بجے تک ووٹ ڈالے جائیں گے ۔اسی روز شام پانچ بجے ووٹوں کی گنتی ہوگی۔
