رہنما خطوط کے مطابق اضلاع کا نقشہ ترتیب دیں اوربندشیں عائد کریں:اجے کمار بھلہ
لازوال ڈیسک
جموں؍؍مرکزی حکومت نے تمام ریاستوں اور مرکز کے زیر انتظام علاقوں کو ہدایت دی ہے کہ وہ وضع کئے گئے رہنما خطوط کے مطابق اضلاع کا نقشہ ترتیب دیں اور کورونا وائرس کے پھیلائو کو موثر روکنے کے لئے بندشیں عائد کریں۔ یہ بات کابینہ سیکرٹری راجیو گابا نے آج ریاستوں اوریوٹیز کے چیف سیکرٹریوں کے ساتھ ایک ویڈیو کانفرنسنگ کے دوران کہی ۔میٹنگ میں داخلہ سیکرٹری اجے کمار بھلہ اور سیکرٹری صحت پریتی سودن کے علاوہ دیگر کئی سینئر افسران موجو دتھے۔جموں وکشمیر کی جانب سے چیف سیکرٹری بی وی آر سبھرامنیم ، فائنانشل کمشنر صحت اتل ڈولو این ایم ڈی این ایچ ایم بھوپندر سنگھ نے تبادلہ خیال کی اس نشست میں حصہ لیا۔ملک میں 3؍ مئی کی صورتحال کے لئے تیاریوں کا جائزہ لیتے ہوئے کابینہ سیکرٹری نے ریاستوں اور یوٹیز کو ہدایت دی کہ وہ مختلف اضلاع کی ریڈ زون ، نارنگی زون اور گرین زون میں زمرہ بندی کریں ۔انہوںنے یہ کام ان علاقوں میں کورونا کے کل معاملات ، ان کے بڑھنے کی شرح ، ٹیسٹنگ اور نگرانی کی بنیاد پر عمل میں لانے کے لئے کہا ۔ کابینہ سیکرٹری نے ان نامزد علاقوں میں صورتحال کی بنیاد پر مرکزی حکومت کی جانب سے جاری ہدایات کے مطابق بندشیں عائد کرنے کی ہدایت دی۔کابینہ سیکرٹری نے زور دے کر کہا کہ مختلف علاقوں خصوصاً حساس علاقوں میں بندشیں عائد کرنے میں کوئی کوتاہی نہیں برتی نہیں جانی چاہیئے۔انہوں نے ایسے اضلاع کی انتظامیہ کو ہوشیار رہنے کے لئے کہا جہاں ابھی تک کورونا کا کوئی معاملہ سامنے نہیں آیا ہے۔طالب علموں اور مہاجر مزدروں کی نقل و حمل کے تعلق سے کابینہ سیکرٹری نے مختلف ریاستوں اور مرکز کے زیر انتظام علاقوں کو ایک معیاری پروٹوکال ترتیب دینے کی ہدایت دی تاکہ یہ لوگ اپنے گھروں کا جاسکے ۔اُنہوںنے مختلف ریاستوں کے چیف سیکرٹریوں کو اس سلسلے میں قریبی تال میل قائم کرنے کی ہدایت دی ۔انہوں نے کہا کہ اس مقصد کے لئے نوڈل افسران نامزد کئے جانے چاہئیں۔لوگوںکی نقل و حمل کے لئے انہوںنے ایسے افراد کی طبی سکریننگ پر زور دیا۔ انہوںنے کہا کہ ایسے طالب علموں اور مزدوروں کی سفر کرنے سے پہلے اور سفر مکمل کرنے کے بعد طبی جانچ کی جانی چاہیئے ۔اُنہوںنے کہا کہ وائر س کے پھیلائو کو روکنے کے لئے ہر ممکن احتیاط برتی جانی چاہیئے ۔
