ایل جی اینٹی کرپشن بیورو کو مزید تقویت دیں تاکہ بدعنوانی کے معاملات پر بھی کارروائی کی جاسکے
لازوال ڈیسک
جموں؍؍نیشنل عوامی یونائیٹڈ پارٹی کے قومی صدر سندیپ سنگھ نے دیہی علاقوں کے سرکاری اسکولوں کی تعلیمی سطح پر تشویش کا اظہار کیا ہے ، انہوں نے لیفٹیننٹ گورنر گیریش چندر مرمو پر زور دیاکہ محکمہ تعلیم کے اسکولوں میں طلباء کی تعداد کی بنیاد پر اساتذہ کو تعینات کیا جائے ۔ دیہی علاقوں میں سرکاری اسکولوں میں اساتذہ کی کمی کی وجہ سے تعلیم کی سطح گر رہی ہے اور اگر اس ضمن میں مناسب اقدامات نہ کیے گئے تو محکمہ تعلیم کی کوتاہیوں کا انکشاف ہوگا۔این اے یو پی کے سندیپ سنگھ نے بتایا کہ بیشتر اساتذہ شہری علاقوں کے سرکاری اسکولوں میں تعینات ہیں جبکہ کوئی بھی دیہات میں بچوں کو پڑھانے جانے کو تیار نہیں ہے۔ لہٰذا یہ ضروری ہے کہ اساتذہ کی پوسٹوں کی تنظیم نو کی جائے۔ جے اینڈ کے بینک کی بھرتیوں کی منسوخی کا خیرمقدم کرتے ہوئے ، این اے یو پی پردھان نے کہا کہ کئی دہائیوں سے جاری اس بینک میں مزید گھوٹالے ہیں جن میں بااثر سیاستدان اور افسر شامل ہوسکتے ہیں۔ انہوں نے لیفٹیننٹ گورنر سے کہا کہ وہ اینٹی کرپشن بیورو کو مزید تقویت دیں تاکہ بدعنوانی کے معاملات پر بھی کارروائی کی جاسکے جبکہ یہ کارروائی صرف سرخیاں بنانے تک ہی محدود نہیں ہے۔پارٹی کے ہیڈکوارٹر میں کارکنوں سے خطاب کرتے ہوئے سندیپ سنگھ نے کہا کہ غریب لوگوں کو معیاری دوائیں نہیں مل رہی ہیں ، جبکہ تشہیر کی جارہی ہے کہ جان آشدی سنٹر میں زندگی بچانے والی دوائیں دستیاب ہیں لیکن حقیقت میں ایسا نہیں ہے۔ حکومت کو معلوم کرنا چاہئے کہ صحت عامہ کے مراکز میں ادویات کیوں نہیں دستیاب ہیں۔ این اے یو پی کے عہدیداروں نے بھی ٹول پلازے کے قیام کی مذمت کی جو آرٹیکل 370 اور 35 اے کے خاتمے کے بعد تشکیل دیئے گئے ہیں۔ اس موقع پر ، شیکھا ٹھاکر کو ویمن یونٹ کی سٹی ہیڈ مقرر کیا گیا جبکہ جگدیش راج چوپڑا ، سومیشور شرما ، اشوک شرما سمیت لوگوں کی ایک بڑی تعداد پارٹی میں شامل ہوگئی۔ اس موقع پر پارٹی کے ممتاز کارکنان انکور گپتا ، اعجاز نائک ، راکیش سنگھ ، چنتن گپتا ، پنکج لانگو ، جگدیش راج ، پونیت بھن ، اوم راج رانا ، پون شرما ، این ایس۔ صراف ، کرنجیت سنگھ اور سوم دتہ شرما بھی موجود تھے۔
