میلبورن، (یو این آئی ) گزشتہ چمپئن سربیا کے نوواک جوکووچ نے پانچویں سیڈ آسٹریا کے ڈومینک تھیم کے سخت چیلنج پر پانچ سیٹ کے میراتھن مقابلے میں اتوار کو 6-4، 4-6، 2-6، 6-3، 6- 4 سے قابو پاتے ہوئے آٹھویں بار سال کے پہلے گرینڈ سلیم آسٹریلین اوپن کا خطاب جیت لیا۔ جوکووچ کا یہ 17 واں گرینڈ سلیم خطاب ہے اور اس خطاب کے ساتھ وہ عالمی رینکنگ میں دوبارہ دنیا کے نمبر ایک کھلاڑی بن گئے ہیں ۔دوسری سیڈ جوکووچ نے تین گھنٹے 59 منٹ تک چلے مقابلے میں تھیم کو پہلی بار گرینڈ سلیم خطاب جیتنے سے محروم کر دیا۔ گرینڈ سلیم خطابات کی آل ٹائم فہرست میں اسپین کے رافیل نڈال (19) اور سوئٹزرلینڈ کے راجر فیڈرر (20) ان سے آگے ہیں۔ پیر کو جاری ہونے والی نئی رینکنگ میں جوکووچ دوبارہ سرفہرست مقام حاصل کر لیں گے ۔پانچ سیٹ کے میراتھن مین کے نام سے مشہور جوکووچ نے میچ میں پہلا سیٹ جیتا لیکن پھر اگلے دو سیٹ تھیم سے گنوا بیٹھے ۔ اس وقت ایسا لگ رہا تھا کہ تھیم الٹ پھیر کر جائیں گے اور اپنا پہلا گرینڈ سلیم خطاب جیتنے میں کامیاب ہوں گے ۔ تھیم نے کوارٹر فائنل میں دنیا کے نمبر ایک کھلاڑی اسپین کے رافیل نڈال کو شکست دی تھی۔26 سالہ تھیم کا یہ پہلا آسٹریلین اوپن فائنل اور تیسرا گرینڈ سلیم فائنل تھا۔ وہ اس سے پہلے 2018 اور 2019 میں فرانسیسی اوپن کے فائنل میں نڈال سے ہارے تھے اور میلبورن میں ان کا خواب جوکووچ نے چکنا چور کر دیا تھا ۔جوکووچ کا اس سیزن میں 13-0 کا میچ ریکارڈ ہو گیا ہے ۔ انہوں نے اس ٹورنامنٹ میں پہلے راؤنڈ میں جو کامیابی حاصل کی تھی وہ ان کے کیریئر کی 900 ویں فتح تھی۔ اس خطابی جیت کے ساتھ انہوں نے 26 گرینڈ سلیم فائنل میں اپنا ریکارڈ 17-9 کر لیا ہے ۔ تھیم کے پاس اس مقابلے میں خطاب جیتنے اور کیریئر کی درجہ بندی میں تیسرے نمبر پر جانے کا مکمل موقع تھا لیکن 32 سالہ جوکووچ کے خلاف وہ کیریئر کے 11 ویں مقابلے میں ہار گئے ۔ جوکووچ نے اب تھیم کے خلاف 7-4 کا ریکارڈ کر لیا ہے ۔جوکووچ کا پیر سے نمبر ایک درجہ بندی پر 276 واں ہفتے شروع ہوگا۔ ان سے آگے اس معاملے میں امریکہ کے پیٹ سمپراس (286 ہفتے ) اور فیڈرر (310 ہفتے ) ہیں ۔راڈ لیور ایرینا میں ریکارڈ 31020 ناظرین کی موجودگی میں کھیلے گئے فائنل میں دونوں ہی کھلاڑیوں نے اعلی سطح کی ٹینس کا مظاہرہ کیا اور میچ کا فیصلہ پانچویں سیٹ میں جاکر ہو پایا۔ پانچویں سیڈ تھیم نے پہلا سیٹ گنوانے کے بعد اگلے دونوں سیٹ جیتے جبکہ گزشتہ چمپئن جوکووچ نے واپسی کرتے ہوئے چوتھا سیٹ جیت کر میچ میں دو دو کی برابری کی۔ جوکووچ نے پھر فیصلہ کن سیٹ جیت کر خطاب اپنے نام کیا۔دوسری سیڈ جوکووچ نے تھیم کے خلاف کیریئر کے 11 ویں مقابلے میں شاندار شروعات کی اور پہلا سیٹ 6-4 سے جیت لیا۔ جوکووچ نے اس سیٹ میں آسٹریا ئی کھلاڑی کو مسلسل دباؤ میں رکھا۔ تھیم کا پہلا سروس گیم سات منٹ تک چلا اور اپنا فورہینڈ باہر مارتے ہی تھیم اپنی سروس گنوا بیٹھے ۔ پہلے سیٹ میں تھیم نے اپنے پانچوں سروس گیم ڈیوس پر کھیلے ۔ جوکووچ نے 53 منٹ میں یہ سیٹ جیت لیا۔دوسرے سیٹ میں تھیم نے مسلسل تین گیم جیتتے ہوئے 3-1 کی برتری حاصل کرلی۔ جوکووچ نے واپسی کرتے ہوئے مقابلے کو نزدیکی بنایا لیکن تھیم 4-3 سے آگے رہے ۔ جوکووچ کو 4-4 کے اسکور پر مقرر 25 سیکنڈ کے اندر اپنی سروس نہ کرنے پر امپائر کی وارننگ بھی ملی۔ تھیم 5-4 کے اسکور پر سیٹ کے لئے سروس کر رہے تھے اور جوکووچ کا بیک ہینڈ باہر جاتے ہی انہوں نے یہ سیٹ 6-4 سے جیت لیا۔تیسرے سیٹ میں تھیم اپنی بہترین کارکردگی پر تھے اور انہوں نے 5-1 کی برتری حاصل کرلی۔ آسٹریائی کھلاڑی نے 6-2 سے یہ سیٹ جیت کر گزشتہ چمپئن پر دباؤ بنا دیا۔چوتھے سیٹ میں دونوں کھلاڑیوں کے درمیان اسکور 3-3 سے برابر ہو چکا تھا لیکن جوکووچ نے پھر مسلسل تین گیم جیت کر اس سیٹ کو 42 منٹ میں 6-3 سے جیت لیا۔میچ ابھی پانچویں سیٹ میں کھنچ گیا۔ مقابلہ مسلسل سخت ہوتا جا رہا تھا اور دونوں کھلاڑی ایک ایک پوائنٹس کے لئے اپنا پورا زور لگا رہے تھے ۔ جوکووچ نے آٹھویں گیم میں اپنی سروس برقرار رکھتے ہوئے 5-3 کی برتری حاصل کرلی۔ اب تھیم کے اوپر نویں گیم میں اپنی سروس بچانے کا دباؤ آ گیا۔ تھیم نے اسکور 30-0 کر دیا۔ تھیم نے 40-15 پر اپنی سروس برقرار رکھی اور اسکور 4-5 کر دیا۔جوکووچ دسویں گیم میں آٹھویں آسٹریلین اوپن، 17 ویں گرینڈ سلیم کے خطاب اور دنیا کی نمبر ایک درجہ بندی کے لئے سروس کر رہے تھے ۔ اپنی سروس پر جوکووچ نے پہلا پوائنٹس گنوایا لیکن دوسرا پوائنٹس لے کر اسکور 15-15 سے برابر کر دیا۔ جوکووچ نے پھر اگلا پوائنٹس لے کر اسکور 30-15 کیا۔ سربیا کے کھلاڑی پھر 40-15 پر پہنچ گئے اور ان کے پاس دو چمپئن شپ پوائنٹس آگئے ۔ انہوں نے آخری سیٹ 6-4 سے نمٹاتے ہوئے خطاب اپنے نام کر لیا۔یو این آئی
