الطاف بخاری کا وزیر اعظم اور وزیر داخلہ سے ملاقات کا باضابطہ اعلان
کہا ’عوام کو ایک موثر سیاسی پلیٹ فارم مہیا کرنا وقت کی اہم ضرورت‘
یواین آئی
سرینگر؍؍جموں کشمیر کے لئے ریاست کے درجے کی واپسی اور نوکریوں و زمین کے تحفظ وغیرہ کے مطالبات کو لے کر سابق وزیر سید محمد الطاف بخاری کی قیادت میں ایک گروپ عنقریب وزیر اعظم نریندر مودی اور وزیر داخلہ امت شاہ کے ساتھ ملاقی ہوگا۔الطاف بخاری کے ترجمان نے بتایا کہ جموں کشمیر کے لئے ریاست کے درجے کی واپسی اور نوکریوں و زمین کے تحفظ وغیرہ کے مطالبات کو لے کر سابق وزیر مسٹر بخاری کی قیادت میں ایک گروپ عنقریب وزیر اعظم نریندر مودی اور وزیر داخلہ امت شاہ کے ساتھ ملاقات کرے گا۔انہوں نے کہا کہ جموں میں گزشتہ روز ہونے والی ایک میٹنگ میں اس بات پر بھی اتفاق کیا گیا کہ جموں کشمیر کے عوام کو ایک موثر سیاسی پلیٹ فارم مہیا کرنا وقت کی اہم ضرورت ہے اور زمینی سطح پر ایک مستحکم سیاسی پلیٹ فارم کی تشکیل کے لئے لوگوں کو منظم کرنے کی ضرورت ہے۔یو این آئی اردو نے نئی پیشرفت کے سلسلے میں جب الطاف بخاری کے ساتھ رابطہ قائم کیا تو ان کا کہنا تھا: ‘میرے والد علیل ہیں میں اس وقت ان ہی کے ساتھ دہلی میں مصروف ہوں، جب ہم جائیں گے تو سب کو بول کر جائیں گے’۔انہوں نے کہا کہ جب ہم وزیر اعظم اور وزیر داخلہ کو ملنے جائیں گے تو اس کے متعلق سب کو مطلع کریں گے۔الطاف بخاری کے ترجمان نے بتایا کہ جموں میں ہونے والی میٹنگ میں ممتاز سیاسی لیڈروں کے علاوہ ماہرین قانون، دانشوروں، سیول سوسائٹی ارکان نے شرکت کی۔انہوں نے کہا کہ میٹنگ میں الطاف بخاری کی قیادت والے گروپ کی جموں کشمیر کے لیفٹیننٹ گورنر گریش چندرا مرمو کے ساتھ ماہ رواں کی 7 تاریخ کو ملاقات کے دوران پیش کئے گئے میمورنڈم بھی زیر بحث آیا اور میمورنڈم میں شامل مطالبوں کو فوری طور پورا کرنے پر زور دیا گیا۔ترجمان کے مطابق میٹنگ میں وادی کشمیر میں موبائیل اور براڈ بینڈ انٹرنیٹ سہولیات کی فوری بحالی کے مطالبے کے ساتھ ساتھ اس بات پر بھی زور دیا گیا کہ پانچ اگست 2019 سے خانہ یا تھانہ نظر بند سیاسی لیڈروں بشمول تین سابق وزرائے اعلیٰ کے علاوہ محبوس وکلا، تجار ور نوجوانوں کو فوری طور پر رہا کیا جائے۔وادی کی موجودہ مایوس کن اقتصادی صورتحال کا سنجیدہ نوٹس لیتے ہوئے میٹنگ میں کہا گیا کہ زراعت، سیاحت، دستکاری، ٹرانسپورٹ، ہوٹل مالکان و ہاؤس بوٹ مالکان و دیگر تجارتی شعبوں سے وابستہ متاثرین کو بھر پور اور بر وقت امداد دی جانی چاہئے۔قابل ذکر ہے کہ الطاف بخاری کی ماہ گزشتہ کی 7 تاریخ کو جموں وکشمیر کے لیفٹیننٹ گورنر گریش چندرا مرمر کے ساتھ سات سیاسی لیڈروں سمیت ملاقات، جس میں انہوں نے موصوف گونر کو ایک پندرہ نکاتی میمورنڈم پیش کیا تھا اور جس کو اگلے روز مقامی اخباروں میں شائع بھی کیا گیا تھا اور بعد ازاں ماہ رواں کی نو تاریخ کو ہی وادی کے دورے پر وارد ہوئے غیر ملکی سفارتکاروں سے ملاقات کے بعد وادی میں ایک نئی سیاسی پارٹی کے قیام کی خبریں نہ صرف گرم ہوئیں بلکہ سیاسی تجزیہ کاروں اور سیاسی گلیاروں میں بھی اس حوالے سے سرگوشیاں ہونے لگیں۔ میمورنڈم میں ریاست کا درجہ واپس کرنے، زمین و نوکریوں کا تحفظ، قیدیوں کی رہائی، انٹرنیٹ کی بحالی سمیت پندرہ مطالبے شامل تھے۔بعض میڈیا رپورٹوں میں کہا گیا تھا کہ وادی میں الطاف بخاری کی قیادت میں عنقریب ایک نئی سیاسی پارٹی کا قیام عمل میں آئے گا۔تاہم انہوں نے گزشتہ روز اپنے ایک بیان میں اْن میڈیا رپوٹوں کو رد کیا جن میں کہا گیا تھا کہ اْن کی قیادت میں جموں وکشمیر میں عنقریب ایک نئی سیاسی پارٹی کا قیام عمل میں آئے گا۔موصوف لیڈر کے ایک ترجمان نے میڈیا کے بعض حلقوں میں گردش کررہی متذکرہ خبروں کو بے بنیاد قرار دیتے ہوئے کہا تھا کہ بخاری کے بارے میں مشتہر کی جانے والی ان خبروں کا مقصد کنفیوڑن اور گمراہی پیدا کرنا ہے۔انہوں نے کہا تھا: ‘یہ کسی کا اپنی ذہنی اختراع ہے، ایسا لگتا ہے کہ سابق وزیر خزانہ الطاف بخاری کے بارے میں مشتہر کی جارہی ایسی خبروں کا مقصد کنفیوڑن اور گمراہی پیدا کرنا ہے’۔الطاف بخاری نے حال ہی میں یو این آئی اردو کو ایک انٹرویو میں بتایا کہ پانچ اگست 2019 ایک سیلاب جیسا تھا جس نے جموں وکشمیر کا گھر گرا دیا۔ وہ اور ان کے ساتھی ریاست کا درجہ اور زمین و نوکریوں کا تحفظ مانگ کر چار دیواری کھڑا کرنا چاہتے ہیں اور بعد میں اگر کوئی لیڈر اس چار دیواری کو سونے یا چاندی سے سجانا چاہتا ہے تو سجا سکتا ہے۔ انہوں نے کہا تھا کہ ہماری طرف سے ریاست کا درجہ واپس مانگنے کا مطلب نہیں کہ دفعہ 370 واپس نہیں مانگا جاسکتا، جب ریاست کا درجہ واپس ملے گا تو باقی چیزیں بھی واپس مل سکتی ہیں۔ مسٹر بخاری نے متعلقین سے اپیل کی تھی کہ وہ الطاف بخاری اور ان کے ساتھیوں کی جدوجہد کو سیاست کی نظر سے نہیں بلکہ خلوص کے جذبے سے دیکھیں اور لیفٹیننٹ گورنر گریش چندرا مرمو سے میمورنڈم کے ساتھ ملاقات کا فیصلہ دماغ کا نہیں دل کا تھا۔ تاہم ان کا ساتھ ہی کہنا تھا کہ اگر ریاست کا درجہ واپس حاصل کرنے، زمینوں اور نوکریوں کے تحفظ اور دیگر چیزوں کے لئے اگر کل کو ایک سیاسی جماعت کی بھی ضرورت پڑے گی تو ایک پلیٹ فارم کھڑا کیا جاسکتا ہے۔
