چین ، نیپال اور دیگر ممالک سے آنے والے مسافروں کی ائیرپورٹ پر جانچ ہوگی:محکمہ صحت
لازوال ڈیسک
جموں؍؍کورونا وائرس کے کسی بھی مشتبہ معاملے پرروک لگانے کے لئے جموں وکشمیر کی حکومت نے چین ، نیپال اور دیگر ممالک سے آنے والے مسافروں کی ائیرپورٹ پر جانچ کے لئے اِقدامات کئے ہیں۔جموںوکشمیر میں مذکورہ وائرس کو پھیلنے سے روکنے کے لئے حکومت نے جموںاور سری نگر میں سٹیٹ سرویلنس دفاتر میں کنٹرول روم قائم کرنے کا فیصلہ کیا ہے جس کے علاوہ تمام اضلاع کو ایڈوائزری جاری کی گئی ہے۔علاوہ ازیں ریلوے سٹیشنوں اور ہوائی اڈوں پر اس بارے میں اعلانات کئے جارہے ہیں۔ اس سلسلے میں فائنانشل کمشنر صحت و طبی تعلیم اتل ڈولو کی صدارت میںمنعقدہ ایک میٹنگ میں فیصلہ لیا گیا ۔فائنانشل کمشنر نے کہا کہ بیرون ممالک سے آنے والے ایسے مسافروںکی جانچ کی جاتی ہے جن میں اس قسم کے مرض کی علامات پائی جاتی ہے۔ انہوں نے کہا کہ تمام اضلاع میں اِس بیماری کی روکتھام کے لئے ڈپٹی کمشنروں کو ایڈوائزری جاری کی جارہی ہے ۔میٹنگ میں بتایا گیا کہ جموںاور سر ی نگر کے میڈیکل کالجوں کے علاوہ سکمز صورہ اور دیگر اضلاع کے ہسپتالوں میں خصوصی وارڈ قائم کئے جارہے ہیں جہاں تربیت یافتہ ڈاکٹروں اور نیم طبی عملے کو تعینات کیا جارہا ہے۔میٹنگ کے دوران جموںاور سری نگرکے میڈیکل کالجوں میں ملٹی ڈسپلنری ریسرچ یونٹوں( ایم آر یوز )کو متحرک کرنے کی ہدایت دی گئی ہے ۔بچائو اقدامات کرنے پر زور دیتے ہوئے فائنانشل کمشنر نے لوگوں کو اِس بارے میں جانکاری فراہم کرنے کے لئے اقدامات کرنے کی ہدایت دی۔حکومت مختلف ممالک سے آنے والے سیاحوںمیں جانکاری پمفلٹ تقسیم کرنے کا بھی منصوبہ رکھتی ہے۔فائنانشل کمشنر نے متعلقہ عملے کو ضروری سازو سامان سے لیس کرنے کی ہدایت دی۔فائنانشل کمشنر کے او ایس ڈی ڈاکٹر شفقت خان کو مرکزی حکومت کے ساتھ رابطے میں رہنے کے لئے خصوصی نوڈل آفیسر نامزد کیا گیا ہے۔میٹنگ میں ناظم صحت جموں ڈاکٹر رینو شرما ، نئے میڈیکل کالجوں کے ڈائریکٹر ڈاکٹر یشپال شرما، پرنسپل گورنمنٹ میڈیکل کالج جموں ڈاکٹر سنندا رینہ اور جوائنٹ ڈائریکٹر صحت و طبی تعلیم مدن لال بھی موجو دتھے۔اِدھر ناظم صحت کشمیر ڈاکٹر سمیر مٹو، ڈائریکٹر سکمز ڈاکٹر اے جی آہنگر ،پرنسپل جی ایم سی سری نگر ڈاکٹر پرویز احمد اور محکمہ کے دیگر افسران نے ویڈیو کانفرنسنگ کے ذریعے میٹنگ میں شرکت کی۔
