یو این آئی
حیدرآباد؍؍آندھراپردیش قانون ساز اسمبلی کے خصوصی سیشن کے دوسرے دن کی کارروائی منگل کو اپوزیشن تلگودیشم کے ارکان کی نعرے بازی کے درمیان شروع ہوئی۔ایوان کی کارروائی کے آغاز کے ساتھ ہی سابق رکن اسمبلی کوٹہ راما راو کی موت پر تعزیتی قرارداد پیش کی گئی۔بعد ازاں ایوان کی کارروائی کا آغاز ہواجس کے ساتھ ہی تلگودیشم کے ارکان نے جئے امراوتی کے نعرے لگانے شروع کردیئے ۔وزیرسماجی بہبود وی وشواروپ نے ایوان میں اس موقع پر ایس سی کمیشن بل پیش کیا۔ایوان میں اُس وقت گڑبڑ دیکھی گئی جب وزیر آبپاشی پی انل کمار یادو نے اپوزیشن لیڈر این چندرابابو کے خلاف نامناسب ریمارکس کئے ۔وزیر موصوف نے الزام لگایا کہ نائیڈو جب وزیراعلی تھے تو انہوں نے انتخابات سے پہلے جلد بازی میں [؟]پسو پوکُاکُم’اسکیم پر عمل کرتے ہوئے خزانہ کو خالی کردیا تھا تاکہ ووٹ حاصل کئے جاسکیں۔
