بھوپال، 13 جنوری (یو این آئی) کانگریس کے سینئر لیڈر اور سابق مرکزی وزیر جیوتیرادتیہ سندھیا نے مرکز کی نریندر مودی حکومت کو ہدف تنقید بناتے ہوئے کہا ہے کہ وہ نوجوانوں کو روزگار دلانے اور اقتصادی محاذ پر ناکام رہی ہے۔
مسٹر سندھیا نے کل شام یہاں آل انڈیا کانگریس سیوادل کے قومی تربیتی کیمپ کے اختتام کے موقع پر خطاب کیا۔ اس موقع پر سیوادل کے سربراہ لال جی دیسائی اور دیگر رہنما بھی موجود تھے۔
مسٹر سندھیا نے کہا کہ سیوادل نے ملک کی آزادی کی لڑائی میں بھی اہم کردار ادا کیا ہے۔ اب سیوادل پر پھر سے ذمہ داری ہے کہ وہ کانگریس کی روایتی پالیسی ملک کے کونے کونے میں لے جائے۔ سیوادل کے کارکنوں نے انگریزوں سے بھی ہار نہیں مانی ہے۔ اس لئے اسے موجودہ چیلنجز کو قبول کرنا ہوگا اور پارٹی کو مضبوط بنانے کے لئے کام کرنا پڑے گا۔
مسٹر سندھیا نے کہا کہ ملک کے موجودہ حالات کسی سے پوشیدہ نہیں ہیں۔ انہوں نے الزام لگایا کہ مرکزی حکومت اقتصادی محاذ پر مکمل طور ناکام ہے۔ وہ روزگار مہیا نہیں کرا پارہی ہے۔ لہذا وہ جذباتی ایشوز اٹھا رہی ہے۔ اس سچائی سے عام لوگوں کو آگاہ کرانا ہوگا۔
سیوادل کا یہ کیمپ یہاں بیراگڑھ علاقے میں ایک ہفتے سے زیادہ وقت تک جاری رہا، جس میں ملک کے مختلف حصوں سے سیوادل کارکنان اور مختلف شخصیات نے شرکت کی۔ اس کیمپ سے کانگریس کے مختلف سینئر رہنماؤں نے خطاب کیا۔
