لکھنؤ؍؍بہوجن سماج پارٹی کی سربراہ مایاوتی نے مہاراشٹر میں شیوسینا کے ساتھ ملکر حکومت بنانے پر اتوار کو کانگریس پر زبردست حملہ کیا اور کہاکہ سکیولر ازم کے تعلق سے ملک کی سب سے پرانی پارٹی کا دوہرا معیار سامنے آگیاہے ۔محترمہ مایاوتی نے اتوار کو کانگریس کو گھیرتے ہوئے ٹوئیٹ کیاکہ ‘‘ شیو سینا اپنے بنیادی ایجنڈے پر اب بھی قائم ہے ،اس لیے انھوں نے شہریت ترمیمی بل پر مرکزی حکومت کا ساتھ دیا۔اب شیوسینا کو ساورکر کے تعلق سے کانگریس کارویہ برداشت نہیں ہے ۔پھر بھی کانگریس پارٹی مہاراشٹر حکومت میں شیوسینا کے ساتھ اب بھی ہے ،تو یہ سب کانگریس کا دوہرا معیار نہیں ہے تو اور کیاہے ۔ ’’انھوں نے کہاکہ کانگریس کو اس معاملہ میں اپنا موقف واضح کرنا چاہئے ۔ورنہ یہ سب پارٹی کی کمزوریوں پرسے عوام کی توجہ ہٹانے کے لیے صرف ڈرامہ بازی ہی مانی جائیگی ۔واضح رہے کہ دہلی میں سنیچر کو کانگریس کی ریلی میں راہل گاندھی نے کہاتھا کہ وہ راہل ساورکر نہیں بلکہ راہل گاندھی ہیں اس لیے معافی کبھی نہیں مانگیں گے ۔مسٹر راہل گاندھی کے اس بیان پر شیوسینا کے رکن پارلیمان سنجے راوت نے کانگریس کانگریس پارٹی کے سابق صدر پر زبردست حملہ کیااور انھیں محتاط اندازمیں بیان دینے کی نصیحت کی ۔مسٹر راوت نے کہاکہ ویر ساورکر ہمیشہ شیوسینا کے لیے ایک آدرش اور قابل احترام رہیں گے ،آزادی کی تحریک میں انکی برابری کرنا بہت مشکل ہے
