نئی دہلی، دسمبر (یو این آئی ) چھ بار کی عالمی چمپئن ایم سی میری کوم نے یہاں بگ باؤٹ انڈین باکسنگ لیگ میں اپنے اچھے کھیل اور اچھے رویے سے سب کا دل جیت لیا۔اس سال کی عالمی چمپئن شپ میں کانسی کا تمغہ جیتنے والی میری کوم نے نیشنل چمپئن شپ کی براؤنز میڈلسٹ سویتا کو فلائی ویٹ کلاس میں تینوں راؤنڈ میں یکطرفہ طریقے سے شکست دی اور مقابلے کے بعد انہوں نے سویتا کی دل کھول کر تعریف بھی کی۔ میری کوم کے خاص طور پر بائیں ہاتھ کے پنچ فیصلہ کن رہے اور کچھ منتخب پنچوں کی مدد سے ہی انہوں نے مقابلہ اپنے نام کر لیا۔ پہلا دن پنجاب پینتھرز کے نام رہا جس نے اڑیسہ واریرزکو پیر کی رات 5-2 سے شکست دی۔گریٹر نویڈا واقع گوتم بدھ یونیورسٹی کے انڈور اسٹیڈیم میں کھیلے گئے مقابلے میں دولت مشترکہ کھیلوں کے سابق چمپئن منوج کمار اس مقابلے کے بہترین کھلاڑی چنے گئے ۔ انہوں نے دن کے پہلے ہی مقابلے میں 69 کلو کلاس میں ازبکستان کے یوکرینین چمپئن کو یک طرفہ مقابلے میں شکست دے کر سب کا دل جیت لیا۔ گزشتہ 13 سالوں سے سینئر کلاس میں کھیل رہے منوج نے انجري کے بعد اترکر اس کا احساس ہی نہیں ہونے دیا کہ وہ طویل عرصے بعد لوٹے ہیں۔اس کے بعد جیسمن نے خواتین 57 کلو گرام کلاس میں سپنا شرما کو اور دیپک نے 52 کلو کلاس میں پي ایل پرساد کو شکست دے کر اڑیسہ کو 2-1 سے آگے کر دیا۔ دیپک کی پي ایل پرساد پر فتح میں نمایاں اتار چڑھاو دیکھنے کو ملا۔ دونوں مکے باز سروسز کے تھے اس وجہ سے ایک دوسرے کی طاقت سے پوری طرح واقف تھے ۔وہیں ارجن ایوارڈ یافتہ سونیا لاتھر نے خواتین کے 60 کلو کلاس میں اڑیسہ ٹیم کی پرینکا چودھری کے خلاف پچھڑنے کے بعد شاندار کامیابی حاصل کی۔ اس کے بعد میری کوم نے سویتا کو شکست دے کر پنجاب پینتھرس کو 3-2 سے آگے کیا۔ ازبیکستانی باکسر خالاکوو نے 57 کلو گرام کلاس میں محمد ابراہیم کو شکست دے کر پنجاب ٹیم کو 4-2 کی فیصلہ کن برتری دلائی اور باقی کام موہت نے نیل کمل سنگھ کو شکست دے کر پنجاب کے لئے کر دیا
