پرتاپ گڑھ (یواین آئی) بھارتیہ جنتا پارٹی کے زیر اقتدار نظم نسق کے حالات ابتر و جنگل راج قائم ہے ۔پولیس عوام کے ساتھ جرائم پیشہ جیسا سلوک کر رہی ہے ۔ سابق مرکزی وزیر و کانگریس لیڈر جتن پرساد ضلع ہیڈ کواٹر سے بیس کلو میٹر مسافت پر ہفتہ کی سہ پہر بربنڈہ گاوں میں پولیس حراست میں مہلوک ساجن شکلہ کے گھر انکے اہل خانہ سے ملاقات کر تعزیت پیش کر انصاف کی یقین دہانی کراتے ہوئے مذکورہ بات کہی ۔کانگریس کے سینئر لیڈر جتن پرساد نے کہا کہ اتر پردیش میں نظم نسق کی قلعی کھل گئی ہے جہاں جنگل راج قائم ہے ۔پولیس عوام کی حفاظت کے برعکس استحصال کر رہی ہے ۔پولیس حراست میں ساجن شکلہ کی موت کے بعد ملزمان پولیس کے ساتھ تساہلی یہ ثابت کرتی ہے کہ اب ملزمان کے خلاف کوئی کارروائی ہونے والی نہیں ہے ۔انہوں نے اہل خانہ کو 50 لاکھ روپیہ مالی تعاون اور متوفی کے دونوں بیٹوں کو سرکاری ملازمت دینے کا مطالبہ کیا ۔انہوں نے کہا کہ مرکز کی مودی و صوبہ کی یوگی حکومت عوام کی آواز دبانے کا کام کر رہی ہے ۔پولیس ایک شخص کو گھر سے حراست میں لے جا کر پیٹ پیٹ کر ہلاک کر دیتی ہے پر مرکزی وزیر اسمرتی ایرانی کو یہ واقعہ معمولی لگتا ہے ۔ساجن شکلہ کی موت کے معاملے میں اب خاموشی نہیں ہوگی اس کی آواز پارلیمنٹ و اسمبلی تک جائے گی ۔اہل خانہ کو انصاف دلانے کیلئے دھرنا مظاہر ہ کرکے حکومت کا گھیراو کیا جائے گا ۔اس موقع پر کانگریس کے مقامی لیڈران موجود رہے ۔
