مسلم لیگ ن کے قائد نواز شریف کی علاج کے لیے لندن روانگی اور ان کے ہمراہ شہباز شریف کے بھی چلے جانے کے بعد یہ سوال جماعت کے کارکنوں اور عوام کے ذہن میں تیزی سے گردش کر رہا ہے کہ مسلم لیگ ن کے پارٹی امور اب کون سنبھالے گا۔
اس معاملے میں پہلا نام جو ذہن میں آتا ہے وہ نواز شریف کی صاحبزادی مریم نواز کا ہے لیکن چوہدری شوگر ملز کیس میں عدالت سے ضمانت اور رہائی کے بعد سے مریم میدانِ سیاست سے دور ہی نظر آئی ہیں۔
اب سوال یہ پیدا ہوتا ہے کہ محض مقدمات کی بنیاد پر کسی کو سیاست کے میدان سے باہر کیا جا سکتا ہے اور کیا ضمانت کے بدلے مریم نواز نے پاسپورٹ کے ساتھ ساتھ اپنا ‘سیاست نامہ’ بھی سرنڈر کر دیا ہے۔
