یواین آئی
بھونیشور؍؍ہندوستانی مرد ہاکی ٹیم نے شاندار کارکردگی کا مظاہرہ کرتے ہوئے روس کو یہاں کالنگا اسٹیڈیم میں جمعہ کے روز اولمپک کوالیفائرس کے پہلے میچ میں 4۔2 سے ہرادیا۔ہندوستانی مردوں کی ٹیم کی شاندار جیت سے قبل ہندوستانی خواتین ٹیم نے امریکہ کو اسی میدان پر 5۔1 سے ہرایا تھا۔ ہندوستان کی دونوں ٹیموں نے اس طرح 2020 میں ٹوکیو کے لئے اپنی دعویداری مضبوط بنالی ہے ۔ اولمپک کوالیفائرس کا دوسرا میچ سنیچر کے روز اسی میدان پر کھیلا جائے گا۔ ہندوستان کو اولمپک ٹکٹ کے لئے دوسرے میچ میں صرف ڈرا کی ضرورت ہے جبکہ روس کو اپنی امیدوں کے لئے کوئی کرشمہ کرنا ہوگا۔ دنیا میں پانچویں نمبر کی ٹیم ہندوستان نے 22 ویں نمبر کی ٹیم روس کے خلاف اپنی جیت کا سلسلہ جاری رکھتے ہوئے کالنگا اسٹیڈیم میں موجود ہزاروں شائقین کو دوہری خوشی دی۔ دوسری جانب روس نے رینکنگ میں اپنے سے 17 مقام اوپر کی ٹیم ہندوستان کے خلاف قابل ستائش جدو جہد کی۔ اور میچ میں دو گول داغے ۔ میچ میں ہندوستان نے آغاز سے ہی دبدبہ بنایا اور پانچویں منٹ میں اسے پنالٹی اسٹروک مل گیا۔ ڈریگ فلکر ھرمنپریت سنگھ نے طاقتور پش سے ہندوستان کو برتری دلا دی۔ لیکن روس نے جوابی حملہ کرتے ہوئے 17 ویں منٹ میں برابری حاصل کر کے ہندوستانی حامیوں کو چونکا دیا۔ آندرے کوریو نے میدانی گول سے روس کو برابری دلائی۔ مندیپ سنگھ نے 24 ویں منٹ میں میدانی گول کر کے ہندوستان کو 2-1 سے آگے کر دیا۔ ہندوستان پہلے ہاف اور تیسرے کوارٹر تک 2-1 سے آگے تھا۔ چوتھے کوارٹر میں 48 ویں منٹ میں ایس سنیل نے پنالٹی کارنر پر ہندوستان کا تیسرا گول کر دیا۔ مندیپ نے 53 ویں منٹ میں میدانی گول کر کے ہندوستان کو 4-1 سے آگے کر دیا۔ مندیپ کا یہ دوسرا گول تھا۔ ہندوستان نے 4-1 کی برتری بنا کر روس کی جدو جہد ختم کر دی۔ روس نے 60 ویں اور آخری منٹ میں گول کر کے اپنی ہار کا فرق کم کیا۔ سیمین متکووسکي نے یہ گول کیا۔ ہندوستان نے 4-2 سے یہ میچ جیت لیا۔ ہندوستان کو اس جیت کے بعد اب ٹوکیو کا ٹکٹ حاصل کرنے کے لئے ہفتہ کو دوسرا میچ ڈرا کرانے کی ضرورت ہوگی۔ دوسری طرف روس کو اپنی توقعات کے لئے نہ صرف بڑی جیت حاصل کرنی ہوگی بلکہ گولوں میں ہندوستان کی برابری کرنی ہوگی تاکہ پوائنٹس اور گولوں کے برابر رہنے کی صورت میں شوٹ آؤٹ کا سہارا لیا جا سکے ۔ نئے فارمیٹ کے مطابق اولمپکس کوالیفائرس میں دو میچ ہونے ہیں جس میں پوائنٹس کی بنیاد پر فیصلہ ہوگا کہ کون سی ٹیم اگلے سال ٹوکیو اولمپکس میں کھیلے گی۔ جیتنے پر تین پوائنٹس اور ڈرا رہنے پر ایک پوائنٹس حاصل کریں گے ۔ اگر پوائنٹس برابر رہتے ہیں تو پھر گول اوسط دیکھا جائے گا اور اگر گول بھی برابر رہتے ہیں تو شوٹ آؤٹ کا سہارا لیا جائے گا۔ اگر شوٹ آؤٹ برابر رہتا ہے تو سڈن ڈیتھ سے اولمپکس میں جانے والی ٹیم کا فیصلہ ہوگا۔
