یواین آئی
صورت ؍؍ موجودہ چمپئن مہاراشٹر نے ایک بار پھر اپنی برتری ثابت کرتے ہوئے یہاں منعقد 39 ویں جونیئر قومی کھو کھو چمپئن شپ میں جمعہ کو لڑکوں اور لڑکیوں کے زمرے کا خطاب اپنے نام کر لیا۔ مہاراشٹر کے لڑکوں نے روایتی حریف کولہاپور کے خلاف دلچسپ فائنل میں ایک پوائنٹس کے فرق سے کامیابی حاصل کرتے ہوئے ٹائٹل پر قبضہ جمایا جبکہ لڑکیوں نے کرناٹک کو دو پوائنٹس کے فرق سے ھراتے ہوئے اس زمرے کا خطاب جیتا۔ لڑکوں نے پہلے راؤنڈ میں نو پوائنٹ لئے جبکہ کولہاپور کی ٹیم پہلی اننگز میں سات پوائنٹ ہی حاصل کر سکی۔ کولہاپور نے پورے ٹورنامنٹ کے دوران شاندار کھیل کا مظاہرہ کیا اور میچ جیتنے کی کوشش کی لیکن مہاراشٹر کے کھلاڑی محتاط تھے اور خطاب کو ہاتھ سے نکلنے نہیں دیا ۔ کولہاپور نے پہلی پاری میں ہوئے نقصان کی تلافی دوسری پاری میں کرنے کی کوشش کی اور مہاراشٹر کے پانچ کھلاڑیوں کو میٹ سے باہر کر دیا تھا لیکن تین پوائنٹ کی برتری کو پیچھے نہیں چھوڑ سکی اور اس طرح مہاراشٹر کے لڑکوں نے دوبارہ چمپئن بننے کا فخر حاصل کیا۔ مہاراشٹر کی لڑکیوں نے کرناٹک کو شکست دے کر جشن میں خود کو شریک کیا۔ پہلے چیز کرتے ہوئے مہاراشٹر کی لڑکیوں نے پہلے راؤنڈ میں پانچ پوائنٹ حاصل کئے جبکہ کرناٹک کی ٹیم تین پوائنٹ ہی حاصل کر سکی۔ دونوں ٹیموں نے دوسری اننگز میں چار پوائنٹس لئے ، جس سے مہاراشٹر کی دو پوائنٹ کی برتری برقرار رہی اور وہ چمپئن بن گیا۔ ریشما راٹھور نے سیمی فائنل کی طرح فائنل میں بھی بہترین کھیل دکھاتے ہوئے مہاراشٹر کے لئے دوسری اننگز میں دو اہم پوائنٹ لئے ۔ دوسری طرف، ریشما نے ڈیفنس کے دوران بھی شاندار کھیل کا مظاہرہ کرتے ہوئے دونوں اننگز میں پانچ منٹ اور 40 سیکنڈ میٹ پر گزارے اور حریف ٹیم کو گھٹنے ٹیکنے پر مجبور کر دیا۔لڑکوں کے لئے دلیپ کھاندوي میچ کے اسٹار رہے اور ہر پاری میں دو پوائنٹ لئے ۔ دلیپ نے ساتھ ہی ڈیفنس کے دوران دونوں اننگز میں چار منٹ میٹ پر گزارے ۔ دلیپ اور ان کی ریاست کی جانوي کو بہترین کھلاڑی کا ایوارڈ ملا۔ ان دونوں کو بالترتیب ویر ابھیمنیو اور جانکی ایوارڈز سے نوازا گیا۔ کولہاپور اور کرناٹک کو لڑکے اور لڑکیوں کے زمرے میں جہاں چاندی کا تمغہ ملا وہیں آندھرا پردیش اور دہلی کو سیکنڈ رنر اپ کا ایوارڈ ملا۔ میزبان گجرات نے لڑکیوں کے کلاس میں چوتھا مقام حاصل کیا۔
