پوچھا!وزیر اعظم نے پہلے ہی ریاستی حیثیت کا وعدہ کیاہے ، اسے مسئلہ کیوں بنایاجارہا ہے ؟
لازوال ڈیسک
نئی دہلی؍؍بی جے پی کے سینئر لیڈر اور راجیہ سبھا ایم پی انجینئرغلام علی کھٹانہ نے بدھ کے روز وزیر اعلیٰ عمر عبداللہ اور ان کے وزراء کی کونسل کی طرف سے جموں و کشمیر کو ریاست کا درجہ بحال کرنے کے لیے منظور کردہ قرارداد پر تنقید کرتے ہوئے اسے تشہیر کا سٹنٹ قرار دیا۔
وہیںسخت تردید میں، کھٹانہ نے اس بات پر زور دیا کہ وزیر اعظم نریندر مودی اور وزیر داخلہ امت شاہ دونوں نے پہلے ہی پارلیمنٹ کے فلور پر جموں و کشمیر کو ریاست کا درجہ بحال کرنے کی یقین دہانی کرائی ہے۔ انہوںنے کہاکہ وزیر اعظم اور وزیر داخلہ نے واضح طور پر وعدہ کیا ہے کہ مناسب وقت پر ریاست کو بحال کیا جائے گا۔انہوںنے کہاکہ آپ کی قرارداد سرخیوں پر قبضہ کرنے کی کوشش کے سوا کچھ نہیں ہے۔
انہوں نے عبداللہ پر مزید زور دیا کہ وہ حکمرانی اور جموں و کشمیر کے عوام سے کئے گئے وعدوں کو پورا کرنے پر توجہ دیں۔کھٹانہ نے کہاکہ آپ وزیر اعلیٰ ہیں اور عوام کو آپ سے توقعات وابستہ ہیں۔ ریاست پر سیاست کرنے کے بجائے اپنے وعدوں کو پورا کرنے میں لگ جائیں۔
