یواین آئی
ممبئی؍؍ہندوستانی کرکٹ کنٹرول بورڈ کے نو منتخب صدر سوربھ گانگولی نے آج اپنا عہدہ سنبھالنے کے بعد کہا کہ ٹیم انڈیا کے کپتان وراٹ کوہلی ہندوستانی کرکٹ میں سب سے اہم شخصیت ہیں اور وہ انہیں اپنی مکمل حمایت دیں گے ۔ بورڈ صدر نے ٹیم انڈیا کے کپتان وراٹ کوہلی کے تئیں اپنی حمایت کا اظہار کرتے ہوئے کہا، "وہ ہندوستانی کرکٹ میں سب سے اہم شخص ہیں جو ٹیم انڈیا کو دنیا میں سب سے بہترین ٹیم بنانا چاہتے ہیں۔ ہمیں ان کے ساتھ بیٹھنا ہوگا اور دیکھنا ہوگا کہ وہ کیا چاہتے ہیں۔ ہم ان کی ہر طرح سے حمایت کریں گے ۔ گانگولی نے کہا کہ ان کے صدر بننے کے حالات تقریبا ویسے ہی ہیں جیسے ان کے کپتان بننے کے وقت تھے ۔موجودہ وقت میں ان کی ذمہ داری بی سی سی آئی کو بہتر انتظامیہ دینے کی ہے ۔میں ویسے ہی اپنا کام کروں گا جیسا میں نے ٹیم انڈیا کی قیادت کرتے ہوئے کیا تھا۔ "ہم ہر معاملے پر نوٹس لیں گے اور ٹیم انڈیا کے مفاد میں بہترین کام کریں گے ۔
