کیجریوال ایماندار ہیں تو صرف وہی عزت کے ساتھ وزیر اعلیٰ کی کرسی پر بیٹھیں گے:سسودیہ
یواین آئی
نئی دہلی؍؍عام آدمی پارٹی (آپ) کے سینئر لیڈر منیش سسودیا نے کہا کہ وزیر اعظم نریندر مودی نے سابق وزیر اعلی اروند کیجریوال کو جیل میں ڈال کر دہلی کے کام کو روکنے کی کوشش کی، اس کے لیے انہیں دہلی کے لوگوں سے معافی مانگنی چاہیے
۔مسٹر سسودیا نے یہاں منعقد ‘جنتا کی عدالت’ پروگرام میں کہا کہ وزیر اعظم نریندر مودی نے مسٹر اروند کیجریوال کو جیل میں ڈال کر دہلی کے کام کو روکنے کی کوشش کی۔ اس کے لیے انہیں دہلی کے لوگوں سے معافی مانگنی چاہیے۔ مسٹر اروند کیجریوال چاہے جیل میں ہوں یا باہر لیکن وہ انہیں کام کرنے سے نہیں روک سکیں گے۔ انہوں نے کہا کہ دہلی والے جانتے ہیں کہ اگر مسٹر کیجریوال وزیر اعلیٰ نہیں رہیں گے تو ان کے بچوں کی تعلیم، اسپتال، مفت بجلی اور بسوں میں خواتین کے مفت سفر کا کیا ہوگا۔
انہوں نے کہا کہ اگر دہلی کے لوگ یہ مانتے ہیں کہ مسٹر اروند کیجریوال ایماندار ہیں تو صرف وہی عزت کے ساتھ وزیر اعلیٰ کی کرسی پر بیٹھیں گے۔ اگر دہلی کے لوگ مجھ پر دوبارہ اعتماد کرتے ہیں تو میں وزیر تعلیم کی کرسی پربیٹھوں گا۔عام آدمی پارٹی کے راجیہ سبھا ایم پی سنجے سنگھ نے کہا کہ مسٹراروند کیجریوال میں ہندوستانی سیاست میں لوٹ مار اور بربادی کے ماحول کو بدلنے کی ہمت ہے اور انہوں نے بڑے غنڈوں کو سامنا کر کے ان کو زمین دکھانے کا کام کیا ہے۔ مسٹر اروند کیجریوال نے دہلی کو مفت بجلی، تعلیم، پانی، محلہ کلینک، ادویات دی، لیکن بھارتیہ جنتا پارٹی (بی جے پی) نے اسے روکنا شروع کردیا۔ انہوں نے کہا کہ بی جے پی کے لیفٹیننٹ گورنر وی کے سکسینہ نے 10500 بس مارشلوں کو برطرف کرکے انہیں بے روزگار کردیا۔
مسٹراروند کیجریوال نے ان بس مارشلوں کو بسوں میں سفر کرنے والی خواتین کی حفاظت کے لیے لگایا تھا۔ ان بسوں میں بی جے پی والوں کی بہنیں اور بیٹیاں بھی سفر کرتی ہیں۔ اگر بی جے پی میں تھوڑی سی بھی انسانیت ہوتی تو وہ مارشلوں کو برخاست نہ ہونے دیتی۔آپ کے دہلی ریاستی کنوینر گوپال رائے نے کہا کہ جس طرح دہلی کے لوگوں نے مسٹراروند کیجریوال کو بھاری اکثریت سے وزیر اعلیٰ بنایا تھا، اسی طرح انہوں نے دہلی کے لوگوں کے لیے بھی کام کیا۔ لیکن بی جے پی یہ بات ہضم نہیں کر سکی اس لیے اس نے فیصلہ کیا کہ وہ نہ تو خود کام کرے گی اور نہ ہی مسٹر کیجریوال کو کام کرنے دے گی۔ بی جے پی نے مسٹر کیجریوال کے کام کو روکنے کی سازش کی۔ بی جے پی نے دہلی کے وزیر صحت ستیندر جین، نائب وزیر اعلیٰ منیش سسودیا، اراکین پارلیمنٹ سنجے سنگھ اور اروند کیجریوال کو جیل بھیج دیا لیکن اس کے بعد بھی کام نہیں رکا۔اس دوران کابینہ کے وزیر سوربھ بھاردواج نے کہا کہ جب سے مسٹرونے سکسینہ دہلی کے لیفٹیننٹ گورنر کے طور پر آئے ہیں، دہلی میں ان تمام سہولیات کو روکنے کی کوشش کی جا رہی ہے جن کی بی جے پی مخالفت کرتی تھی۔
