جموں: بارڈر سیکیورٹی فورس (بی ایس ایف) کااہلکار پاکستانی فوج کی جانب سے سرحدی علاقے میں بلا اشتعال فائرنگ کے نتیجے میں زخمی ہوگیا،ہے اطلاعات کے مطابق آج علی الصبح پاکستان کی جانب سے جنگ بندی معاہدے کی خلاف ورزی کی گئی ہے۔اہلکاروں نے بتایا کہ بی ایس ایف کے دستے نے بھی جواب دیا لیکن پاکستانی جانب ہونے والے نقصانات کے بارے میں فوری طور پر کچھ معلوم نہیں ہو سکا۔
بی ایس ایف کے ترجمان نے کہا، “تقریباً 2:35 بجے صبح، اکھنور کے علاقے میں سرحد کے پار سے بلا اشتعال فائرنگ کا واقعہ پیش آیا جس کا بی ایس ایف نے مناسب جواب دیا۔ ایک بی ایس ایف اہلکار پاکستانی فائرنگ میں زخمی ہوا۔”
انہوں نے کہا کہ فوجی اہلکار ہائی الرٹ پر ہیں اور بین الاقوامی سرحد اور کنٹرول لائن پر سخت نگرانی کر رہے ہیں۔
بھارت اور پاکستان کے درمیان جنگ بندی کی خلاف ورزی بہت کم ہو گئی ہے جب سے دونوں ممالک نے 25 فروری 2021 کو جنگ بندی معاہدہ دوبارہ بحال کیا۔ گزشتہ سال، ایک بی ایس ایف جوان رام گڑھ سیکٹر میں پاکستان رینجرز کی فائرنگ میں ہلاک ہوا، جو کہ تین سال سے زیادہ عرصے میں بھارتی جانب ہونے والا پہلا جانی نقصان تھا۔
تازہ ترین جنگ بندی کی خلاف ورزی اسمبلی انتخابات کے پہلے مرحلے سے چند دن پہلے ہوئی ہے، جو کہ 18 ستمبر کو منعقد ہوں گے۔ انتخابات کے دوسرے مرحلے کا انعقاد 25 ستمبر کو ہوگا جبکہ تیسرے مرحلے کا انعقاد یکم اکتوبر کو ہوگا۔
