کہا خواتین کے ساتھ ہونے والی کوئی بھی ناانصافی ناقابل برداشت، تکلیف دہ اور انتہائی قابل مذمت ہے
لازوال ڈیسک
نئی دہلی؍؍کانگریس کے صدر ملکارجن کھڑگے نے کہا ہے کہ ملک میں خواتین کے خلاف مظالم کے واقعات بار بار ہو رہے ہیں اور مودی حکومت نے گزشتہ 10 برسوں میں ان کو روکنے کے لیے کوئی قدم نہیں اٹھایا، اس لیے اس سمت میں سب کو مل کر کام کرنے کی اشد ضرورت ہے ۔مسٹر کھڑگے نے کہا، ’’ہماری خواتین کے ساتھ ہونے والی کوئی بھی ناانصافی ناقابل برداشت، تکلیف دہ اور انتہائی قابل مذمت ہے۔ ہمیں ’بیٹی بچاؤ‘ کی نہیں’بیٹی کے لیے مساوی حقوق کو یقینی بنانے‘ کی ضرورت ہے۔ "خواتین کو تحفظ نہیں، خوف سے پاک ماحول کی ضرورت ہے۔”
انہوں نے کہا کہ ملک میں ہر گھنٹے میں خواتین کے خلاف 43 جرائم ریکارڈ کیے جاتے ہیں۔ روزانہ 22 جرائم ایسے ہیں جو ہمارے ملک کے سب سے کمزور دلت قبائلی برادری کی خواتین اور بچوں کے خلاف درج ہوتے ہیں۔ ایسے بے شمار جرائم ہیں جو درج ہی نہیں ہوتے- ڈرسے، خوف سے، سماجی وجوہات کی وجہ سے۔ وزیر اعظم مودی جی نے لال قلعہ پر اپنی تقریروں میں کئی بار خواتین کی حفاظت کی بات کی ہے، لیکن ان کی حکومت نے گزشتہ 10 برسوں میں ایسا کچھ ٹھوس نہیں کیا، جس سے خواتین کے خلاف جرائم میں کچھ کمی ہو۔ اس کے برعکس ان کی پارٹی نے کئی بار متاثرہ کی کردار کشی بھی کی ہے، جو کہ شرمناک ہے۔
https://inc.in/
کانگریس صدر نے کہا، "کیا ہر دیوار پر ‘بیٹی بچاؤ’ پینٹ کرنے سے سماجی تبدیلی آئے گی یا حکومتیں اور امن و امان موثر ہو جائے گا؟ کیا ہم حفاظتی اقدامات کرپارہے ہیں؟ کیا ہمارا نظام انصاف بہتر ہوا ہے؟ کیا معاشرے کے استحصال زدہ اور محروم طبقے اب ایک محفوظ ماحول میں رہنے کے قابل ہیں؟ کیا حکومت اور انتظامیہ نے واردات کو چھپانے کی کوشش نہیں کی ہے؟ کیا پولیس نے متاثرین کی آخری رسومات زبردستی کرنا بند کردیا ہے، تاکہ حقیقت سامنے نہ آسکے؟
مسٹرکھڑگے نے کہا، ’’ہمیں سوچنا ہوگا کہ جب 2012 میں دہلی میں ‘نربھیا’ کے ساتھ واقعہ پیش آیا تو جسٹس ورما کمیٹی کی سفارشات نافذ ہوئی تھیں، کیا آج ہم ان سفارشات کو پوری طرح نافذ کرنے میں کامیاب ہیں؟ کیا 2013 میں کام کی جگہ پر خواتین کے خلاف جنسی جرائم کی روک تھام سے متعلق ایکٹ کے التزامات پر صحیح طریقے سے عمل کیا جا رہا ہے، جس سے کام کی جگہ پر ہماری خواتین کے لیے خوف سے پاک ماحول پیدا ہوسکے؟ آئین نے خواتین کو برابری کا درجہ دیا ہے۔ خواتین کے خلاف جرائم ایک سنگین مسئلہ ہے۔ ان جرائم کو روکنا ملک کے لیے ایک بڑا چیلنج ہے۔ ہم سب کو ایک ساتھ آنا ہوگا اور معاشرے کے ہر طبقے کو ساتھ لے کر اس کا حل تلاش کرنا ہوگا۔
انہوں نے کہا کہ اب وقت آگیا ہے کہ خواتین کے ساتھ ہر جگہ انصاف ہو۔ شہروں میں اسٹریٹ لائٹس، خواتین کے بیت الخلائ یا دیگر تمام بنیادی سہولیات ہوں یا پولیس اور انصاف کے نظام میں اصلاحات کی بات ہو، ہمیں خواتین کے لیے خوف سے پاک ماحول کو یقینی بنانے کے لیے ہر قدم اٹھانا چاہیے۔
