کٹرہ میں سازش، بجالتا میں قتل؛پولیس کی کامیاب کارروائی: 11 مشتبہ افراد گرفتار، اغوا شدہ گاڑی بھی برآمد
ملزمان کے خلاف سخت کارروائی: کیس میں دفعات 103 بی این ایس شامل۰آپریشن کی نگرانی: ایس ایس پی، ایس پی رورل، اور ایس ڈی پی او کی اہم کردار
جان محمد
جموں؍؍جموں پولیس نے جموں کے ایک ٹیکسی ڈرائیور منگل سنگھ کے اغوا اور قتل کا کیس کامیابی کے ساتھ حل کر لیا ہے، جس میں ہریانہ کے ضلع فتح آباد، رتھیا کے بین الریاستی مجرموں کے ایک گروہ کو گرفتار کیا گیا ہے۔ کیس میں اہم پیش رفت اس وقت ہوئی جب گروہ کے انکشاف کے بعد منگل سنگھ کی لاش نگروٹہ کے بجالتا موڑ کے علاقے سے برآمد کی گئی۔
یہ کیس اْس وقت سامنے آیا جب 19 اگست 2024 کو منگل سنگھ کے بھائی نے گمشدگی کی رپورٹ درج کرائی کیونکہ منگل کٹرہ سے گھر واپس نہیں آیا تھا۔ 21 اگست کو جب سی سی ٹی وی شواہد کی بنیاد پر اغوا کا شبہ بڑھا تو دفعہ 140 بی این ایس کے تحت ایف آئی آر (نمبر 228/2024) درج کی گئی۔
انسپکٹر پرویز سجاد، ایس ایچ او نگروٹہ اور انسپکٹر نیشانت گپتا، ایس ایچ او جھجھر کوٹلی کی قیادت میں اور ایس پی رورل جموں شری برجیش شرما کی نگرانی میں پولیس نے مختلف مقامات سے سی سی ٹی وی فوٹیج، کال ڈیٹا ریکارڈز اور کٹرہ میں ہوٹلوں کے ریکارڈز جمع کر کے تجزیہ کیا۔ ان کوششوں سے ایک اہم تکنیکی سراغ ملا جس سے مشتبہ افراد تک پہنچنا ممکن ہوا۔
اس سراغ کی بنیاد پر، ایس ایچ او نگروٹہ کی قیادت میں پولیس ٹیم نے ہریانہ کے سرسا میں مقامی پولیس اور کاؤنٹر انٹیلی جنس یونٹ کی مدد سے ایک مربوط آپریشن کیا۔ اس کارروائی کے نتیجے میں جرم میں ملوث 11 افراد کو گرفتار کیا گیا، جن میں سازش اور پناہ دینے کا الزام بھی شامل ہے۔ چھینی گئی انووا گاڑی (رجسٹریشن نمبر JK02BG-7407) بھی برآمد کر لی گئی۔
گرفتار شدگان کے نام درج ذیل ہیں:گورپریت سنگھ عرف گوپی، ولد امرک سنگھ، سکھویندر سنگھ عرف پریت، ولد گوردیو سنگھ، گرسوک سنگھ عرف سیوک، ولد جندر سنگھ، گردیپ سنگھ عرف بنا، ولد جندر سنگھ،لکی سنگھ، ولد جگزیرہ ،ساحل عرف تارا سنگھ، ولد اوتار سنگھ، ارجن عرف کٹیا، ولد سبھاش،لکی سنگھ، ولد گرجندر سنگھ ، گوپال کمار عرف گوپی، ولد ہرپھول چنداورگرجیت سنگھ ولد گلاب سنگھ ،تمام رہائشی ناگل، تحصیل رتھیا، ضلع فتح آباد، ہریانہ جبکہ کلدیپ سنگھ عرف کالا، ولد نچتر سنگھ، رہائشی خوشلا، سردولگڑھ، پنجاب ہے۔
تحقیقات سے پتہ چلا کہ اس گروہ نے کٹرہ میں منگل سنگھ کے اغوا کی سازش رچی اور مجرمانہ ارادے کے ساتھ اسے بجالتہ کے قریب بے دردی سے قتل کر دیا، جس کے بعد اس کی لاش علاقے میں پھینک دی۔ لاش کو مقتول کے خاندان کے افراد اور اہم مقامی لوگوں کی موجودگی میں برآمد کیا گیا۔ پوسٹ مارٹم کے بعد لاش کو آخری رسومات کے لیے قانونی وارثان کے حوالے کر دیا گیا۔
یہ آپریشن، جس نے کیس کو چار دن کے اندر حل کر لیا، ایس ایس پی جموں، ایس پی رورل جموں، اور ایس ڈی پی او نگروٹہ کی نگرانی میں انجام دیا گیا۔ ملزمان کے خلاف الزامات کو دفعہ 103 بی این ایس اور دیگر متعلقہ دفعات شامل کرکے اپڈیٹ کیا گیا ہے، تاکہ انہیں قانون کے دائرے میں لایا جا سکے۔
