جموں و کشمیر میں اتحاد ‘لیکن’ کانگریس کارکنوں، لیڈروں کے مفاد کی قیمت پر نہیں: راہل گاندھی
کہا جموں و کشمیر کے لوگوں کو پسند نہیں کرتا بلکہ میں ان سے محبت کرتا ہوں
لازوال ڈیسک
سری نگر// کانگریس کے سینئر لیڈر اور لوک سبھا میں پارٹی کے اپوزیشن لیڈر راہل گاندھی نے جمعرات کو کہا کہ جموں و کشمیر میں اتحاد ہوگا لیکن کانگریس کارکنوں اور لیڈروں کے مفاد کی قیمت پر نہیں۔
سری نگر میں کانگریس کارکنان کے اجلاس سے خطاب کرتے ہوئے راہل نے کہا کہ جموں و کشمیر میں اتحاد یقینی طور پر ہوگا۔ لیکن کانگریس کارکنوں اور قائدین کے مفاد کی قیمت پر اتحاد نہیں ہوگا۔ راہل نے سری نگر میں کارکنوں سے خطاب کرتے ہوئے کہا کہ آپ سبھی (کارکنان) کو یقین دلانا چاہئے کہ پارٹی کارکنوں اور لیڈروں کے مفادات اور احترام پر کوئی سمجھوتہ نہیں کیا جائے گا۔
راہل نے کہا کہ انہوں نے اے آئی سی سی کے سربراہ ملکارجن کھرگے سے ملاقات کی اور پہلے جموں و کشمیر کا دورہ کرنے کا فیصلہ کیا۔ "ہم جموں و کشمیر کے لوگوں کو ایک پیغام دینا چاہتے ہیں اور ان کی نمائندگی اور ریاست کا درجہ ہمارے لئے سب سے زیادہ ہے۔
راہول نے کہا کہ بدھ کی شام اس نے سری نگر میں وازوان اور آئس کریم کا مزہ چکھا۔ انہوں نے کہا کہ میں ایک آئس کریم کی دکان پر کچھ لوگوں سے ملا جہاں کچھ لوگوں نے مجھ سے کہا کہ کیا مجھے جموں و کشمیر کے لوگ پسند ہیں؟ اس سے مجھے غصہ آیا اور میں نے انہیں جواب دیا کہ میں جموں و کشمیر کے لوگوں کو پسند نہیں کرتا لیکن میں ان سے پیار کرتا ہوں۔ انہوں نے کہا کہ کشمیر کے ساتھ میرا پرانا رشتہ ہے اورکشمیر سے میرا خون کا رشتہ ہے۔
وزیر اعظم نریندر مودی پر طنز کرتے ہوئے راہول نے کہا کہ انڈی بلاک مودی کے اعتماد اور نفسیات کو متزلزل کرنے میں کامیاب ہوگیا ہے۔
