ہم ملک میں نفرت کی دیوار توڑ کر محبت کے راستے ہموار کرنا چاہتے ہیں: شیبان فائز، صدر BYF
جلگاؤں: برائٹ یوتھ فاؤنڈیشن جلگاؤں کے زیرِ اہتمام جشنِ یومِ آزادی کے موقعہ پر اردو زبان میں ایک مضمون نویسی مقابلہ 11، اگست 2024 کو لیا گیا تھا جس میں تین گروپ موجود تھے۔ جونیر، سینیر اور مدرسہ گروپ۔ جونیر گروپ میں کلاس پانچویں تا ساتویں کے طلبہ و طالبات نے ‘کتنا پیارا دیش ہمارا’ اس عنوان پر 30 سطروں پر مشتمل مضمون 90 منٹ میں تحریر کیا تھا۔ اسی طرح سینیر گروپ میں کلاس آٹھویں تا دسویں کے طلبہ و طالبات نے ‘پھر ایک بار بھارت کو سونے کی چڑیا بنائیں گے’ اس عنوان پر 40 سطروں پر مشتمل مضمون 90 منٹ میں تحریر کیا تھا۔ اسی طرح شہر جلگاؤں کے 4 مدرسوں نے اس مقابلہ میں شرکت کی تھی اور مدرسہ گروپ سے طلبہ و طالبات نے ‘جنگِ آزادی میں مسلم رہنماؤں کا کردار’ اس عنوان پر 40 سطروں پر مشتمل مضمون 90 منٹ میں تحریر کیا تھا۔ 15 اگست، 2024 کو پترکار بھون میں اس مقابلہ کے فاتحین کا اعلان کیا گیا جس میں جونیر گروپ سے چھٹی جماعت کی طالبہ الصباح پروین شفیق خان (اقراء شاہین اردو ہائی اسکول مہرون جلگاؤں) نے اول مقام حاصل کیا۔ دوم انعام پانچویں جماعت کی طالبہ صباء انجم طارق خان ( ملت اردو ہائی اسکول مہرون جلگاؤں) نے حاصل کیا۔ پانچویں جماعت کی سید لزیرہ وسیم علی (ملت اردو ہائی اسکول مہرون جلگاؤں) نے سوم انعام حاصل کیا۔ سینیر گروپ سے دسویں جماعت کی طالبہ ادیبہ مبین جاوید شیخ (اقراء شاہین اردو ہائی اسکول مہرون جلگاؤں) نے اول مقام حاصل کیا۔ دوم انعام نویں جماعت کی طالبہ ارم عمران خان سکلگر ( ملت اردو ہائی اسکول مہرون جلگاؤں) نے حاصل کیا۔ نویں جماعت کی فاطمہ الطاف کھاٹک (ملت اردو ہائی اسکول مہرون جلگاؤں) نے سوم انعام حاصل کیا۔ اسی طرح مدرسہ گروپ سے اول انعام سید صفوان سید ذاکر، دوم انعام محمد مظفر، سوم انعام محمد ساجد نے حاصل کیا۔ مقابلہ میں 200 سے زیادہ طلبہ و طالبات نے شرکت کیں۔ تقسیمِ انعامات کے اہم پروگرام کی صدارت شہر جلگاؤں کے مشہور انگریزی کے استاد، سماجی کارکن اور مجلسِ اتحاد المسلمین کے ضلع صدر محترم شیخ احمد حسین نے کی۔ مہمانانِ خصوصی کے طور پر مدرسہ انوار العلوم کے استاد محترم مولانا عبد الرحمن صاحب، انور سکلگر صاحب، واصف شاہ صاحب، ارشد شیخ صاحب، اقراء شاہین کے صدر مدرس جناب ضمیر قاضی صاحب، ملت پرائمری اسکول کے معلم شعیب شیخ صاحب، سماجی کارکنان سعید شیخ صاحب اور کامل خان صاحب وغیرہ موجود تھے۔ اس پروگرام کو کامیاب بنانے کے لیے برائٹ یوتھ فاؤنڈیشن کے صدر شیبان فائز، حذیفہ شیخ، زبیر شیخ، دانش کھاٹک، فیضان شیخ پیش پیش تھے۔
