کہا نیشنل کانفرنس کمزور طبقات کے لیے خصوصی اسکیمیں اور منصوبے لائے گی
لازوال ڈیسک
رام نگر؍؍موجودہ حکومت جموں و کشمیر میں لوگوں کے ساتھ ساتھ معاشرے کے کمزور طبقات کے حقوق کے تحفظ میں مکمل طور پر ناکام ہو چکی ہے۔یہ بات وجے لوچن، چیئرمین جے کے این سی ایس سی سیل، جموں نے رام نگر میں ادھم پور رورل کے ایک روزہ کنونشن سے تبادلہ خیال کرتے ہوئے کہی۔ واضح رہے یہ کنونشن رامپرشوتم شرما، ضلع صدر ادھم پور رورل کی صدارت میں منعقد ہوا۔وہیںکنونشن کے آغاز میں رامپرشوتم شرما، ضلع صدر ادھم پور رورل جنہوں نے آج کے کنونشن کا اہتمام کیا، نے پارٹی کے سینئر عہدیداروں کو دور دراز علاقوں کے لوگوں کو درپیش مسائل سے آگاہ کیا جن میں بنیادی سہولیات کی عدم دستیابی، بے روزگاری، بجلی اور پانی کی بے قاعدہ فراہمی، مقامی صحت کے مراکز اور سڑکوں کی ناگفتہ بہ حالت شامل ہیں۔
ورکرز کنونشن سے تبادلہ خیال کرتے ہوئے وجے لوچن نے کہا کہ موجودہ انتظامیہ کی بدانتظامی اور عوام دشمن پالیسیوں کی وجہ سے پورے خطوں کو بڑے چیلنجز کا سامنا ہے۔ انہوں نے جموں و کشمیر انتظامیہ کے عوام کے تئیں منفی رویہ رکھنے پر سخت مایوسی کا اظہار کیا اور الزام لگایا کہ موجودہ انتظامیہ ان پر کوئی توجہ نہیں دے رہی ہے۔ انہوں نے مشاہدہ کیا کہ جموں و کشمیر میں غربت کی شرح دن بدن بڑھ رہی ہے۔ انہوں نے کہا کہ ریاست میں دلتوں کو انصاف دینے سے انکار کیا گیا ہے۔ انہوں نے مزید کہا کہ بی جے پی کے دور حکومت میں غریب اور دلت لوگوں کو سماجی اور معاشی طور پر تنگ کیا گیا ہے جس کی وجہ سے جموں و کشمیر میں دلتوں اور دیگر پسماندہ طبقات کا مستقبل تاریک ہے۔
انہوں نے کمزور طبقات کی آزادی کے ساتھ ساتھ معاشی بااختیار بنانے کے لیے کوششیں تیز کرنے کی ضرورت پر زور دیا تاکہ وہ معاشرے میں اپنا مفید کردار ادا کر سکیں۔لوچن نے زور دے کر کہا کہ نیشنل کانفرنس ماضی میں بھی ایس سی ؍ایس ٹی اور سماج کے کمزور طبقات کے حقوق کے تحفظ کے لیے ہمیشہ پابند رہی ہے اور مستقبل میں بھی ایسا ہی کرتی رہے گی۔ انہوں نے پارٹی کارکنوں سے کہا کہ وہ آئندہ اسمبلی انتخابات کے لئے تیار ہوجائیں کیونکہ ان کا اعلان کسی بھی وقت ہوسکتا ہے۔ انہوں نے پارٹی کیڈر پر زور دیا کہ وہ اپنے اپنے علاقوں میں ایک آؤٹ ریچ پروگرام کریں اور انہیں اس بات سے آگاہ کریں کہ بی جے پی نے الیکشن سے پہلے 2014 میں ان کے ساتھ کئے گئے وعدوں کو کس طرح دھوکہ دیا ہے۔ انہوں نے ان سے کہا کہ وہ کمیونٹی کے لوگوں کو لوگوں کے حقوق کے تحفظ کے لئے نیشنل کانفرنس کے عزم کا اعادہ کریں۔
