لازوال ڈیسک
جموں؍؍دیہی آبادی کی فلاح و بہبود اور جموں و کشمیر میں نچلی سطح پر جمہوریت کو مضبوط بنانے کے لیے کام کرنے والی ایک رجسٹرڈ تنظیم آل جموں و کشمیر پنچایت کانفرنس (اے جے کے پی سی) نے مرکزی وزیر خزانہ نرملا سیتا رمن کو کئی مطالبات پیش کئے۔جموں میں ذرائع ابلاغ سے بات کرتے ہوئے اے جے کے پی سی کے صدر انیل شرما نے تنظیم کے دیگر ارکان کے ساتھ مرکزی حکومت پر زور دیا کہ وہ جموں و کشمیر کے لوگوں سے کیے گئے اپنے وعدوں کو پورا کرے۔ شرما نے زور دے کر کہا کہ ایک دہائی سے زیادہ عرصے سے جموں و کشمیر کے لوگ وزیر اعظم نریندر مودی اور بی جے پی کے وعدوں کے عملی ہونے کا انتظار کر رہے ہیں۔
شرما نے منریگا کے اعزازیہ میں یومیہ 400 روپے تک اضافہ کرنے کا مطالبہ کیا اور وزیر خزانہ سے کہا کہ وہ جموں و کشمیر میں 2017 سے اب تک منریگا مزدوروں اور دکانداروں کی زیر التواء ذمہ داریوں کو ختم کرنے کے لیے بجٹ میں انتظامات کریں۔ ان کے مطالبات میں جموں تا پونچھ ریلوے پروجیکٹ شروع کرنا اور جموں اور سری نگر میٹرو پروجیکٹس کا سنگ بنیاد رکھنا بھی شامل ہے۔اے جے کے پی سی کے صدر نے اس بات پر بھی روشنی ڈالی کہ آرٹیکل 370 کی منسوخی کے بعد جموں و کشمیر کے لوگ پر امید ہیں کہ جموں وکشمیر کے تمام یومیہ اجرت والوں کو انصاف ملے گا اور ان کی خدمات کو باقاعدہ بنایا جائے گا۔ انہوں نے زور دے کر کہا کہ مرکزی بجٹ میں اس سنگین مسئلے کے بارے میں وزیر خزانہ کی طرف سے ایک اہم بیان کو شامل کرنے کا وقت آگیا ہے۔
انہوں نے کہاکہ یہاں جموں و کشمیر میں بے روزگاری ایک بڑا مسئلہ ہے، اور ہمارے پڑھے لکھے نوجوان تناؤ اور پریشانی کا شکار ہیں۔ اس طرح، یہ حکومت کی ذمہ داری ہے کہ وہ پیشہ ور ڈگری ہولڈروں کو کم از کم 5000 روپے ماہانہ وظیفہ فراہم کرے جب تک کہ انہیں روزگار نہیں مل جاتا۔اے جے کے پی سی نے ہر سب ڈویژن میں آئی ٹی آئی کالجوں کے ساتھ ایک ٹیکنیکل یونیورسٹی، ایک خواتین یونیورسٹی اور جموں و کشمیر کے لیے ایک لا یونیورسٹی کے قیام کا بھی مطالبہ کیا۔ شرما نے مرکزی وزیر اخزانہ سے مطالبہ کیا کہ آنگن واڑی اور آشا کارکنوں کے ماہانہ اعزازیہ کو 10 فیصد سالانہ انکریمنٹ کے ساتھ بڑھایا جائے، ان ضروری کارکنوں کے تئیں ہمدردی کا اظہار کیا جائے۔اس موقع پرا نہوں نے دیگر کئی اہم مسائل کو بھی زیر غور لایا۔
